Almatydaǵy klınıkalar 14,5 mlrd teńgege konsýltatıvti-dıagnostıkalyq qyzmet kórsetti

ALMATY. QazAqparat – 2021 jyly almatylyq klınıkalar halyqqa 14,5 mlrd teńgege KT/MRT syndy konsýltatıvtik-dıagnostıkalyq kómek túrlerin kórsetti. Bul týraly onlaın brıfıng barysynda «Áleýmettik medıtsınalyq saqtandyrý qory» KEAQ Almaty fılıaly dırektory Tileýhan Ábildaev málim etti, dep habarlaıdy QazAqparat tilshisi.

Onyń aıtýynsha, qor Almaty turǵyndaryna saqtandyrý paketi sheńberinde kórsetilgen qyzmetterge 93,0 mlrd teńge tóledi. Shyǵynnyń basym bóligi – 48,6 mlrd teńgeden astamy statsıonarlyq medıtsınalyq kómekke, 3,9 mlrd teńge kúndizgi statsıonar qyzmetine tólendi.

Jyl qorytyndysy baǵasy qymbat bolyp keletin analızder, dıagnostıka men operatsııa túrlerin halyqtyń saqtandyrý esebinen qajetinshe paıdalanyp jatqanyn kórsetti.

«Mysaly, konsýltatıvtik-dıagnostıkalyq qyzmetterge 14,5 mlrd teńge tólengen. Konsýltatıvtik-dıagnostıkalyq qyzmetter ishinde, ásirese KT/MRT-ǵa degen suranys joǵary. Bir jylda Almaty qalasynda jalpy somasy 848,1 mln teńgeni quraıtyn 70 myńnan astam KT jasaldy. Taǵy 50 myńnan astam MRT qyzmetine Qor 681,8 mln teńge bóldi. Sonymen qatar, onkologııalyq naýqastardy nysanaly túrde tekserýge arnalǵan 6 myńnan astam PET-dıagnostıkaǵa 1,5 mlrd teńgeden astam qarjy tólendi» - dedi fılıal basshysy.

Saqtandyrý qarajatyna qarqyndy túrde kórsetilip jatqan qyzmettiń biri – medıtsınalyq reabılıtatsııa nemese ońaltý qyzmeti.

Buǵan ótken jyly 6,2 mlrd teńge bólindi. Onyń 222,4 mln teńgesi postkovıdtik reabılıtatsııaǵa jumsalǵan.