Almatydaǵy qarý dúkenderin kásibı mamandar tonaǵan

ALMATY. QazAqparat - Almatyda jappaı tártipsizdikter kezinde qarý-jaraq dúkenderinen 1 424 atys qarýy urlanǵan. Ol qarýlardyń kópshiligi atýǵa beıimdelgen jáne halyqqa naqty qaýip tóndiredi. Bul týraly qalalyq polıtsııa departamentinen málim etti, dep habarlaıdy QazAqparat tilshisi.

«Torlardy kóliktermen julyp, arnaıy daıyndalǵan qurylǵymen syndyrdy. Olarda bári boldy. Qolǵaptarmen jumys istedi, al qolǵaptar – arnaıy. Munda kásibı mamandar jumys istedi. Óıtkeni dúken kásibı túrde ashylǵan. Olarda kóp ýaqyt bolmady, sol sebepti torlardy syndyra bastady», – dedi «Arma-56» mamandandyrylǵan qarý-jaraq dúkeniniń dırektory Aleksandr Alekseenok.

Polıtsııa departamentiniń málimetinshe, qazirgi ýaqytta qalada qarýdy, onyń ishinde qarý-jaraq dúkenderinen urlanǵandardy izdestirý jáne tárkileý, sondaı-aq qaladaǵy qylmystyq ahýaldy jaqsartýǵa baǵyttalǵan «Quqyqtyq tártip» is-sharasy ótip jatyr.

«Osy dúkenderdiń qoımalarynda sórelerge qoıylǵan qoldanysta emes qarýlardyń quramdas bólikteri, sondaı-aq atýǵa jaramdy qarýlar da saqtalǵan. Keıbir dúkenderdegi qylmyskerler atýǵa jaramdy qarýǵa jetip úlgergen, sodan keıin olardy urlap ketken. Qoldanysta emes qarýdy, eger quramdas bólikteri bar bolsa, beıbit turǵyndar men quqyq qorǵaý organdarynyń qyzmetkerlerine qarsy qoldanylýy múmkin ekendigin eskertemin. Azamattardan zańsyz qarý saqtaý faktileri anyqtalsa nemese tabylsa, óz erkimen tapsyrýlaryn suraımyz. Qarýdy óz erkimen tapsyrý qylmystyq jaýapkershilikten bosatady», – dedi Almaty qalalyq PD Ákimshilik polıtsııa basqarmasy bastyǵynyń orynbasary Bolatbek Baıatanov.