Almatydaǵy karantın sharalaryna renjigender boldy – restoratorlar qaýymdastyǵynyń basshysy

ALMATY. QazAqparat - Almaty qalasynda engizilgen bir aptalyq qatań shekteý sharalaryna qatysty aqparatty kásipkerler ár túrli qabyldady. Arasynda renjip-ashýlanǵandar da bolǵan. Bul týraly onlaın brıfıng barysynda Qazaqstan restoratorlar klýby qaýymdastyǵynyń basshysy Gúlnar Kátibaeva aıtty, dep habarlaıdy QazAqparat tilshisi.

Onyń aıtýynsha, restoratorlardyń birneshe chaty bar. Jańadan ashylǵan kásipkerlik nysandarynyń ıesi bir aptaǵa jumys toqtaıdy degen jańa qaýlyny jaqsy qabyldaǵan joq.

«Bul túsinikti jaǵdaı. Onyń ústine shekteý sharalary halyq demalatyn mereke kúnderimen tuspa tus keletin bolǵan soń ashýlanǵandar boldy. Al burynnan jumys istep júrgen restoratorlar baısaldylyq tanytty», - deıdi ol.

Sonymen qatar, ol qazir qalada ınfektsııanyń órship turǵanyn tilge tıek etti.

«Qazir halyqtyń kóbi aýyryp jatyr. Onyń ishinde kásipkerlerdiń týystary da, tanystary da, ózderi de bar bolýy múmkin. Sondyqtan árıne, alǵashqy emotsııalar basylǵan soń olar densaýlyqtyń mańyzdyraq ekenin túsindi. Qalypty jumys rejımine oralý úshin bir apta talapty qatań saqtap, epıdemıologııalyq jaǵdaıdy ońaltý qajet ekenin ózderi de aıtty», - deıdi Gúlnar Kátibaeva.