Almatydaǵy ınvestıtsııalyq jobalar: 5 myń jumys orny ashylmaq

ALMATY. QazAqparat- Almatyda 2021 jyly 92 jańa nysan paıdalanýǵa beriledi, dep habarplaıdy QazAqparat tilshisi.

Almaty ákimi Baqytjan Saǵyntaevtyń tóraǵalyǵymen ótken apparattyq jıynda aǵymdaǵy jyly ınvestıtsııalyq jobalardy iske asyrýdyń barysy qaraldy.

Qabyldanǵan júıeli sharalardyń arqasynda Almaty eldiń ınvestıtsııalyq barynsha tartymdy qalalarynyń birine aınaldy.

Bıylǵy jyly qala ónerkásip, qurylys, densaýlyq saqtaý, bilim, mádenıet, saýda jáne qyzmet kórsetý salalarynda birden 92 jobany júzege asyrýdy josparlaýda.

Investıtsııa tartýda turǵyn úı, óndiristik jáne áleýmettik nysandardy salý negizgi qozǵaýshy kúsh.

Máselen, jyljymaıtyn múlik salasynda jalpy somasy 66,9 mlrd teńge bolatyn 34 kópsalaly turǵyn úı keshenin paıdalanýǵa berý kózdelgen.

Ónerkásip salasynda jalpy somasy 37,6 mlrd teńgeni quraıtyn 20 jobany, Indýstrıaldy aımaq aýmaǵynda 10 jobany («Novus Polymer», «Valtherm», «Astana Invest» Korporatsııasy», «Nedex Almaty», «City Stone», «Kaz-Dıa-Test JShS jáne basqalary), qala aýmaǵynda 5 jobany («Kazferrostal»,«Intermýltservıs», «Serebro Profit», «TorgStroı» JShS, «Evrazıan Fýds Korporeıshn» Aq) júzege asyrý josparda.

Sondaı-aq, jyl sońyna deıin qalada quny 2,85 mlrd teńge bolatyn 5 ónerkásiptik park («KazStroyTrade», «ADS Industries», «Ala Estate», «D&J Investments & Logistic», «Asia Prom Textile» JShS) iske qosylyp, 1400 jumys orny ashylatyn bolady. Qazirgi kezde kompanııalar qurylys-montaj jumystaryn júrgizýde. Búgingi kúni óndiristik parkter ınvestorlary 19 kásiporynmen jalǵa berýdiń aldyn ala sharttaryn jasady.

Sonymen qatar, jalpy quny 31,8 mlrd tenge bolatyn 14 áleýmettik jobany, onyń quramyna sport jáne óner ortalyǵy («High Tech Academy» Qazaqstandaǵy alǵashqy ınnovatsııalyq jobalyq mektep), «Helmer» medıtsınalyq ońaltý ortalyǵy, Orta Azııalyq ekologııalyq zertteýler ınstıtýty, «Demeý Qory»AQ nyń balet teatry engen, saýda jáne qyzmet kórsetý salasynyń jalpy somasy 22,5 mlrd teńge bolatyn 24 jobany iske asyrý josparlanǵan.

Bul jobalardy júzege asyrǵan kezde 5000-nan astam jumys orny ashylatyn bolady. Sonymen birge, ınvestıtsııa tartý kólemi trıllıon teńge deńgeıinen asady dep kútilýde.

Eske salsaq, 2020 jyly Almatynyń negizgi kapıtalyna salynǵan ınvestıtsııa kólemi 971,2 mlrd teńgeni qurady. Qalada jalpy quny 175 mlrd teńge bolatyn 51 joba oryndaldy.