Almatydaǵy halyqaralyq konferentsııada jyraýlyq ónerdiń búgini men bolashaǵy talqylanýda
Oǵan Almaty qalalyq mádenıet basqarmasynyń ókilderi, Qazaqstan, Qyrǵyzstan, Túrkııa, Bashqurtstan, Qaraqalpaqstan jáne Daǵystannyń Noǵaı óńirinen mádenıettaný, ónertaný, qoǵamtaný salasynda eńbek etetin ǵalymdar, mamandar, jyrshylar jáne stýdent jastar qatysýda.
«Búgingi halyqaralyq ǵylymı-tájirıbelik konferentsııanyń kózdegen maqsaty - túbi bir túrki tildes halyqtar dástúrindegi epıkalyq jyraýlyq ónerdiń alatyn ornyn, búgini men bolashaǵyn aıqyndaý. Óıtkeni búgingi tańda bul óte bir ózekti máselelerdiń biri dep esepteımin. Jyraýlarymyzdyń búgingi qoǵamda alar ornyn, mártebesin aıqyndaý úlken mańyzǵa ıe. Ǵasyrlar boıy táýelsizdikti ańsaǵan halqymyzdyń ómir jolynda jáne búginde táýelsizdikke qol jetkizýimizge jyraýlardyń sińirgen eńbegi ushan-teńiz. Sonaý Asan qaıǵy, Qaztýǵandardan bastap, Abylaı hanyń qasyndaǵy Buhar jyraý, Kenesary hannyń qasyndaǵy Nysanbaı jyraý, Isataı batyrdyń qasyndaǵy Mahambet aqyn, keshegi Súıinbaı aqyndar halyqty biriktirip, bereke-birlikke shaqyryp, ulttyq rýhyn, namysyn kóterýde ólsheýsiz úles qosty. Sondyqtan jyraýlar búgingi tańda da tarıh sahnasynan túspeýi kerek. Óıtkeni, jyrshy-jyraý bar jerde halyqtyń ulttyq oı-órisi, dúnıetanymy durys baǵytta bolady», - dedi «QazAqparat»tilshisine bergen suhbatynda Yqylas atyndaǵy ulttyq mýzykalyq aspaptar murajaıynyń dırektory, fılologııa ǵylymdarynyń kandıdaty, tanymal jyrshy Uljan Baıbosynova.
Konferentsııa barysynda sonymen qatar, jyraýlyq ónerdiń mektepteri, oryndaýshylaq dástúrler, qazaq halqynyń epıkalyq jyraýlyq óneriniń tarıhy, Anadoly halqynyń epıkalyq jyr aıtý dástúri, manasshylar, Qaraqalpaq halqynyń jyraýlyq dástúri boıynsha baıandamalar jasalady.
Al búgin keshki saǵat 19:00-de Abaı atyndaǵy memlekettik akademııalyq opera jáne balet teatrynda «Uly Dala Eli» festıvali aıasynda «Jyr qanatyndaǵy tarıh» atty gala-kontsert bolady.