Almatydaǵy eń qymbat TOP-10 mektep

ASTANA. QazAqparat – Almaty qalasynda túrli baǵyttaǵy bilim berý mekemeleri kóp jáne bul qatarda jekemenshik mektepterdiń alar orny erekshe. Osy maqalada «QazAqparat» tilshisi qaladaǵy eń qymbat 10 mekteptiń tizimin usynyp, árbiriniń bilim berý ereksheligi men oqý tásilin taldap kórdi.

1. Almatydaǵy halyqaralyq QSI mektebi

Qazaqstandaǵy eń qymbat mektepterdiń birinde bilim alý quny – jylyna 11 mıllıon 570 myń teńge. Onyń ishine tirkelý jarnasy, bilim berý baǵdarlamasy men balalarǵa arnalǵan qosymsha úıirmeler kiredi. Jeńildik qarastyrylmaǵan.
Degenmen qosymsha qyzmetter bar. Máselen, oqýshylardyń tamaqtanýy kúnine 2400 teńge, al balalardy mektepke jetkizý jylyna mıllıon teńge bolady. Bul mektepte biryńǵaı forma kııý mindetti emes ekenin aıta ketken jón. Sol sebepti oǵan shyǵyndalýdyń qajeti bolmaıdy.
2. Haileybury Almaty
Bul mektep 1-2 synyp oqýshylaryna jylyna 9 mıllıon 140 myń teńgege brıtan oqý baǵdarlamasyn usynady.
Oqý qunyna 4 mezgil tamaqtaný, úıirmeler men sektsııalar, akademııalyq bilim alý men tárbıe jumysy, kantselıarııa taýarlary men dápterler, arnaıy akademııada aǵylshyn tilin úıretý, kúzet pen medıtsına pýnktiniń qyzmeti kiredi.
Degenmen 45 myń teńge kóleminde tirkelý jarnasy men 450 myń teńge kepil jarnasyn bólek tóleý qajet.
2. Qazaqstan halyqaralyq mektebi
Bul mektepke birinshi synyp oqýshysyn berý jylyna 8 mıllıon 835 myń teńge turady. Qor alymy jyldyq oqý aqysynyń 1/3 bóligi bolady. Bul alym balanyń synyptaǵy ornyna kepildik beredi.
Bul mektepte bilim alý baǵasy dollarmen esepteletinin aıta ketken jón. Qazaqstandyq teńge qunsyzdanatyn bolsa – oqý aqysy kóteriledi.
Ata-analar balalardyń tamaqtanýyna kúnine qosymsha 2700 teńge tóleıdi. Oqý jylynda mektep avtobýsyn paıdalaný eki jaqqa 600 myń teńge bolsa, tek bir baǵytqa – 450 myń teńge turady.
Degenmen KIS-te birneshe balasyn oqytatyn ata-analarǵa ekinshi balaǵa 5% jáne odan keıingi ár balaǵa 20% jeńildik qarastyrylǵan. Jeńildikti jınaqtaýǵa bolmaıdy.
4. High Tech Academy
Bul mektep jylyna 5 mıllıon 875 myń teńgege 1-5 synyp oqýshylaryna fın bilim berý úlgisin usynady. Bul baǵaǵa bilim berý baǵdarlamasy, úsh mezgil tamaqtaný men oqý materıaldary kiredi. Oqý aqysyn jyl basynda tolyq tóleýge nemese aı saıyn bólip tólep turýǵa bolady.
Bir otbasydan eki nemese odan kóp bala osy mektepke baratyn bolsa, 10% jeńildik jasalatynyn erekshe atap ótý kerek.
Oqýǵa qabyldanar kezde 150 myń teńge kóleminde jarna engizip, 30 myń teńge turatyn suhbattan ótý kerek. Suhbattan sátti ótken bala mektepke avtomatty túrde qabyldanady degendi bildirmeıdi.
5. Halyqaralyq Mıras mektebi
Bul mektepte birneshe tilde, ıaǵnı qazaq, orys jáne aǵylshyn tilderinde bilim alýǵa bolady. Oqý aqysy tańdaǵan tilge baılanysty bolady. Máselen aǵylshyn tilinde bilim alý jylyna 5 mıllıon 123 myń teńge, al qazaq nemese orys tilindegi bilim quny – 4 mıllıon 329 myń teńge. Sondaı-aq orys tilinde matematıkany tereńdetip oqýǵa bolady. Baǵasy – 3 mıllıon 150 myń teńge.
Oqýǵa túsý úshin 400 myń teńge jarna tóleý mindetti. Osy mektepte birneshe balasy oqıtyn otbasylarǵa ekinshi balaǵa 5% jáne odan keıingilerine 10% jeńildik qarastyrylǵan. Mektepte arnaıy mektep formasy bar ekenin aıta keteıik. Ony bólek satyp alý qajet.
6. Tamos Education
Bul uıymda bastaýysh synyp oqýshylary túrli baǵyt boıynsha bilim alady. Máselen, «CAMBRIDGE» bólimshesi jylyna 4 mıllıon 356 myń turatyn tek aǵylshyn tilindegi oqý baǵdarlamasyn usynady.
Fızıka-matematıka mektebi 2 mıllıon 400 myń teńgege orys tildi jáne 2 mıllıon 160 myń teńgege qazaq tildi baǵdarlamamen oqytady.
Balalarǵa aǵylshyn jáne qytaı tilderin úıretetin lıngvıstıka mektebi orys tilinde 2 mıllıon 500 myń teńgege, qazaq tilinde 2 mıllıon 430 myń teńgege bilim beredi. Jylyna 1 mıllıon 900 myń teńge turatyn bastaýysh matematıka mektebi bar.
Qosymsha 500 myń teńgege 3 mezgil tamaqtaný qyzmetin satyp alýǵa bolady. Aı saıyn 38-42 myń teńgege tasymaldaý qyzmeti de bar, baǵasy mektep pen úı arasyndaǵy qashyqtyqqa baılanysty ózgerip otyrady. Tirkelý jarnasy – 300 myń teńge.
Sondaı-aq oqý ornynda bir otbasynyń eki balasy oqysa, bireýine 5% jeńildik jasalady.
7. Halyqaralyq Galaxy mektebi
Kembrıdj oqý baǵdarlamasyn usynatyn bul uıymda bilim alý baǵasy – jylyna 4 mıllıon 300 myń teńge.
Bul baǵaǵa bilim berý baǵdarlamasy, oqý materıaldary men mektepten tys qosymshalar kiredi. Oqý aqysyn birden tólegenderge 5% jeńildik jasalady. Sonymen qatar bir otbasynyń ár balasyna 5% jeńildik qarastyrylǵan.
Oqýǵa túser kezde tapsyratyn emtıhandy tóleý kerek, onyń baǵasy – 10 myń teńge. Synyptaǵy oryndy brondaý úshin salynatyn alǵashqy jarna – 500 myń teńge. Bul soma oqý aqysyna qosylǵan.
Tamaqtaný men mektep formasy bólek satyp alynady.
8. Shoqan Ýálıhanov atyndaǵy mektep
Bul mektepte birinshi synyp oqýshysynyń jyldyq oqý aqysy – 4 mıllıon 50 myń teńge. Bir rettik alǵashqy jarna – 420 myń teńge.
Oqý aqysyna memlekettik jalpyǵa mindetti bilim berý standarty, respýblıkalyq, halyqaralyq jáne basqa da zııatkerlik jarystarǵa daıyndaý, aptasyna 4 saǵat kóleminde mekteptegi úıirme men sektsııalarǵa qatysý, bastaýysh mektepte uzartylǵan kún toby, medıtsınalyq jáne psıhologııalyq kómek, úsh mezgil tamaqtaný kiredi.
Bir otbasynyń ekinshi jáne úshinshi balasyna 10% jáne jyldyq oqý aqysyn birden tólese 5% jeńildik bar.
9. NGS Jańa urpaq mektebi
Bul mekteptiń 0-11 synyp oqýshylary jylyna 3 mıllıon 700 myń teńgege oqıdy. Bilim berý qyzmetteri, medıtsınalyq kómek, onyń ishinde logoped, psıholog, sondaı-aq qosymsha júzý, rıtmıka, shahmat sabaqtary, bes mezgil tamaqtaný osy baǵaǵa kiredi. Degenmen 500 myń teńge kóleminde tirkelý jarnasyn tóleý qajet.
Mindetti mektep formasy, balalardy tasymaldaý, ekskýrsııa, lager syndy sabaqtan tys ýaqyttaǵy qosymsha sabaqtar bólek tólenedi.
Mektepte bir otbasynyń eki ne odan da kóp balasy oqyǵan jaǵdaıda 5% jeńildik qarastyrylǵan.
10. Jánııa Áýbákirovanyń avtorlyq mektebi
Bul mektepte bilim alý salystyrmaly túrde arzan – jylyna 3 mıllıon teńge. Bul somaǵa jalpy bilim berý baǵdarlamasy, mýzykalyq bilim berý, shahmattan bastap robototehnıkaǵa deıingi damytý úıirmeleri kiredi. Sondaı-aq balalar psıhology, balalar dárigeri, logopedtiń kásibı qoldaýyn alyp, tórt mezgil úılestirilgen tamaq ishedi.
Bazalyq nemese arnaıy mýzykalyq kezeńdi tańdaý bólek tólenedi.
Bazalyq mýzykalyq kezeń – jylyna 200 myń teńge.
Arnaıy mýzykalyq kezeń – jylyna 400 myń teńge.
Tasymaldaý bólek tólenedi. Aıyna 40 myń teńge shamasynda.
Buǵan deıin Almatyda jańa oqý jylynda 31 myń bala birinshi synypqa barǵany habarlanǵan bolatyn. Bilim kúni Almatyda 323 mektep esigin aıqara ashty, onyń 215-i memlekettik bolsa, 108-i – jeke mektep.