Almatydaǵy ekinshi jylý elektr ortalyǵy 2026 jyldyń sońynda gazǵa aýystyrylady
Memleket basshysy ekologııa máselesin jiti nazarda ustaıdy. Byltyr Almaty qalasyna jumys saparymen kelgen Prezıdent almatylyqtardy qaladaǵy aýanyń lastanýy qatty alańdatyp otyrǵanynan habardar ekenin jetkizgen edi.
Onyń aıtýynsha, jyl saıyn atmosferaǵa shyǵarylatyn zııandy qaldyqtyń kólemi 125 myń tonnaǵa jýyqtaıdy.
Aýany negizinen avtokólikter, qalalyq jylý elektr stantsııalary, ónerkásip kásiporyndary jáne gaz tartylmaǵan jer úıler lastaıdy.
Megapolıste aýanyń taza bolýyna tyǵyz ári retsiz salynǵan ǵımarattar da kedergi keltirip tur.
Memleket basshysy ákimdikke ónerkásip kásiporyndarynyń ekologııalyq qaýipsizdik normalaryn saqtaýyn qatań qadaǵalaýdy tapsyryp, JEO-2 jáne JEO-3 ortalyqtaryn gazǵa kóshirý arqyly zııandy qaldyqtardy on eseden astam tómendetýge bolatynyn aıtqan edi.
Búginde megapolıstegi aýanyń lastanýynyń negizgi sebepteriniń biri JEO-2 bolyp tabylady, mamandardyń baǵalaýy boıynsha zalaldy shyǵaryndylardyń 30%-na deıin oǵan tıesili.
Osy jyldyń mamyr aıynda Erbolat Dosaev «Samuryq-Energo» AQ, «Qazaqgaz UK» AQ, «KEGOC» AQ, «Samruk-Kazyna Construction» AQ, «Alataý jaryq kompanııasy» AQ basshylarymen joǵaryda atalǵan máselege qatysty kezdesken bolatyn.
Kezdesý barysynda taraptar megapolıstiń energokeshenin damytý perspektıvalaryn, onyń ishinde JEO-2 gazǵa aýystyrý, jylý magıstraldaryn, elektr jelilerin jańǵyrtý, Almaty aglomeratsııasynyń turǵyn alaptaryn odan ári gazdandyrý, qoǵamdyq kólikke arnalǵan gaz quıý stantsııalaryn salý máselelerin talqylady.
Memleket basshysynyń tapsyrmasyna sáıkes birinshi kezeńdi 2024 jyldyń jeltoqsanynda aıaqtaý josparlanýda. «Samuryq-Qazyna» UÁQ» AQ basshylyǵy merziminde úlgerýge daıyn ekendigin aıtty.
Jalpy, JEO-2-ni gazǵa aýystyrý birinshi kezeńdi iske qosý kezinde zalaldy shyǵaryndylar sanyn – 35 myń tonnadan 23 myń tonnaǵa deıin, 2026 jyly tolyq iske asyrý kezinde – 2,7 myń tonnaǵa deıin (jalpy 12 eseden astam) tómendetýge múmkindik beredi.
Bıyl JEO-2 jańa gaz stantsııasyn jobalaý jáne salý boıynsha merdiger aıqyndalatyn bolady.
Elektr energetıkalyq holdıngtiń málimetinshe, ashyq halyqaralyq tenderdiń birinshi kezeńi barysynda 6 ótinim kelip tústi.
Onyń ishinde ekinshi, qorytyndy kezeńge 2 kompanııa ótti.
Tenderdiń jeńimpazy osy jyldyń ekinshi toqsanynda anyqtalady. Qurylys-montajdaý jumystarynyń bastalýy 2023 jyldyń tamyzyna boljanyp otyr.
Al JEO-2-niń gazǵa tolyq kóshirý 2026 jyldyń jeltoqsanynda aıaqtalady.
Atalǵan joba Úkimet bekitken Jol kartasy aıasynda júzege asyrylyp jatyr jáne Almaty qalasynda kómirden jylý jáne elektr energııasyn óndirýdi toqtatýǵa múmkindik beredi.
Sonymen qatar qalanyń qorshaǵan ortasyna shyǵaryndylardy aıtarlyqtaı qysqartady.
Qazir qalada magıstraldyq gaz qubyrlary bar, biraq halyq áli tolyq qosylmaǵan.
Erbolat Dosaevtyń sózinshe, 2023-2024 jyldar aralyǵynda qala tolyqtaı gazǵa kóshedi. Qazir Almatyda gaz tartý deńgeıi 99,2%.
Shyn máninde, kómirdi paıdalaný kólemi óte tómen, kómir bazalaryn negizinen Almaty oblysynyń turǵyndary paıdalanady.
Almaty oblysynyń ákimdigi JEO-2 jáne JEO-3-ti gazben qamtamasyz etý úshin Qarasaı aýdanynda 612 jer telimin satyp almaq.