Almatydaǵy eki jańa metro beketi «Shuǵyla» jáne «Tóle bı» dep atalýy múmkin

ALMATY. QazAqparat – Almatyda ashylatyn eki jańa metro beketi «Shuǵyla» jáne «Tóle bı» dep atalýy múmkin. Bul týraly qalalyq máslıhattyń VI sessııasynda Tilderdi damytý jáne onomastıka bóliminiń basshysy Baqyt Qalymbet málimdedi, dep habarlaıdy QazAqparat tilshisi.

Aıtýynsha, metro beketi qurylysynyń jobasyna tehnıkalyq-ekonomıkalyq negizdeme ázirleý úshin jańa beketterge ataý berý qajettiligi týyndap otyr.

«Naýryzbaı aýdanyndaǵy «Shuǵyla» shaǵyn aýdany Alataý dańǵylynyń boıyndaǵy №1 beketti onomastıkalyq tájirıbege súıene otyryp, jolaýshylardyń baǵdar alýyna yńǵaıly bolýy úshin «Shuǵyla» dep ataý usynylyp otyr. Al, Alataý dańǵylymen uzartylatyn Tóle bı kóshesiniń qıylysynda bolatyn №2 beketke «Tóle bı» ataýyn berý usynylyp otyr», - dedi ol.

Spıkerdiń sózinshe, bul usynysty Almaty qalasy onomastıka komıssııasy quptaǵan. Qala basshylyǵy tarapynan da qoldaý tapqan. Endi Almaty ákimdigi men máslıhatynyń birlesken sheshimimen QR Úkimetiniń janyndaǵy respýblıkalyq onomastıka komıssııasyna joldanady. Komıssııa kelisim berse, Almaty ákimdiginiń qaýlysymen sheshim qabyldanady.