Almatydaǵy dinı birlestikter klýby Qurban aıt merekesimen quttyqtady

ALMATY.QazAqparat - Almaty qalasyndaǵy dinı birlestikter klýbynyń basshylary ortalyq meshitke kelip, musylman qaýymdy Qurban aıtpen quttyqtady, dep habarlaıdy QazAqparat tilshisi.

Almatydaǵy ortalyq meshitke dinı birlestikter klýbynyń basshylardy keldi. «Bahaı» qaýymdastyǵy, «Lıýteran» shirkeýi, Krıshna sanasy qoǵamy, Rım Katolık Eparhııasy jáne ındýızm ókilderi barsha musylmandardy Qurban aıt merekesimen quttyqtady.

«Bizdiń tilimiz ben dinimiz bólek bolǵanymen, nıetimiz bir. Almatydaǵy barlyq dinı birlestikter atynan barsha qazaqstandlyqtardy,Qurban aıt merekesimen quttyqtaımyn. Elimiz tynysh, halqymyz aman bolsyn! Shalǵan qurbandyqtaryńyz qabyl bolyp, barlyq duǵa-tilekterińiz oryndalsyn», - dedi Almaty jáne Almaty oblysyndaǵy Іnjil Hrıstıan baptıster shirkeýleriniń aǵa presvıteri Alekseı Lýboshnıkov.

Almaty qalasynyń bas ımamy Erkinbek Kerimbekuly qonaqtarǵa Qurban aıt meıramynyń ereksheligi men qurban shalýdyń saýabyn aıtyp berdi.

«Bul erekshe dinı meıram. Beıbitshilik, birlik jáne kelisim sııaqty jalpy adamzattyq qundylyqtardy saqtaýǵa yqpaly zor. Qurban aıtty barsha musylman qaýym asyǵa kútedi. Bul kúnderdiń ulyqtyǵy sol - munda adam balasy óz Jaratýshysyna barynsha jaqyndaýǵa múmkindik alady. «Qurban» sózi de arab tilinen aýdarǵanda, «jaqyn bolý», «jaqyndaý» maǵynasyn bildiredi. Allanyń raqym-meıirimine qol jetkizýdiń bir joly dep túsingen abzal. Musylman ár jylda qurban shalyp, sol qurban etiniń bir bóligin otbastaryna, ekinshi bóligin týǵan-týystaryna, joldastaryna jáne turmysy tómen otbasylarǵa taratyp beredi», - dep túsindirdi Almaty qalasynyń bas ımamy.

Qurban aıt - musylmandardyń eń qasıetti merekesi. Ol «oraza aıttan» keıin 70 kúnnen soń bastalyp, 3 kúnge sozylady. Qurban aıt meıramynyń jamaǵat arasyndaǵy birlikti kúsheıtip, baýyrlastyqty arttyrýdaǵy róli zor.«Aıt - aǵaıyn arasyn jaqyndastyra túsetin, adamzat balasyn ımandylyqqa uıytyp, qanaǵat pen táýbege úndeıtin ulyq mereke. Bul kúnderi barsha musylman izgi amalymen Allanyń razylyǵyna bólenedi. Ulttar men ulystardy birlik pen ıgilikke, meıirim men keshirimge bastaǵan múbárak meıram»,-dedi Almaty qalalyq dinı birlestikter klýbynyń tóraǵasy Kákimjan Bıshmanov.

Klýb músheleri Qurban aıt dastarhanynan dám tatyp, arnaıy uıymdastyrylǵan mádenı is-sharalardy tamashalady.

Qalalyq Qoǵamdyq damý basqarmasynyń málimetine sáıkes, Almatyda 17 konfessııanyń 180 dinı birlestigi jumys isteıdi.