Almatydaǵy Bek Air ushaǵy qalaı apatqa ushyrady – alǵashqy nusqa jarııalandy

NUR-SULTAN. QazAqparat – Premer-mınıstrdiń orynbasary, Almatydaǵy ushaq apaty boıynsha úkimettik komıssııa múshesi Roman Sklıar Almatydaǵy Bek Air ushaǵynyń qalaı apatqa ushyraǵanyn aıtyp berdi, dep habarlaıdy QazAqparat tilshisi.

«Ushaq apatynan kóz jumǵandardyń týǵan-týystaryna qaıǵyra kóńil aıtamyz. Bul jaǵdaıǵa qatysty eshkim de memlekettiń qoldaý sharalarynan tys qalmaıdy. Qaıtys bolǵandardyń týǵan-týystary men zardap shekkenderde qajetti barlyq kómek pen qoldaý kórsetiledi. Oqıǵa tirkelgennen bastap úkimettik komıssııa tıisti jumysty bastap ketti. Búgin biz ushý-qoný jolaǵyna áýe kemesiniń artqy bóliginiń birizdi sıpatta eki ret janasqanyn anyqtadyq. Jolaqqa janasý aralyǵy 300-400 metr shamasynda boldy. Ushar kezde áýe kemesi eki ret ushý-qoný jolaǵyna soqtyqqan», - dedi Roman Sklıar Almatyda shuǵyl ótken baspasóz máslıhatynda.

Úkimet basshysy orynbasarynyń aıtýyna qaraǵanda, ushý-qoný jolaǵy aıaqtalǵannan keıin áýe kemesi ońǵa burylǵan. Shassı bul ýaqytta jınaqtalyp qoıǵan.

«Ushaq ushyp ketpek bolǵanymen oń jaqqa aýyp ketip, jeke úıdiń qorshaýyna soǵylǵan. Úıde eshkim bolmaǵan. Áýe kemesi soqtyǵys saldarynan ekige bólinip ketken. Negizinen ushaqtyń aldyńǵy jaǵynda otyrǵan jolaýshylar kóz jumǵan», - dedi Roman Sklıar.

Foto: www.emer.gov.kz