Almatydaǵy balalar aýrýhanasyna 5 jańa reanımatsııalyq kereýet tabys etildi
Quny 14 mln teńge turatyn kereýetti qor prezıdenti Aıdan Súleımenova satyp alǵan.
Pandemııa kezeńinde Almatynyń balalar juqpaly aýrýlar aýrýhanasy qaıta jabdyqtalyp, elimizdiń iri megapolısinde jańa koronavırýs ınfektsııasymen kúresetin basty ortalyqqa aınaldy. Munda vırýs juqtyrǵan balalar ǵana emes, eresekter de emdelip jatyr.
Tótenshe jaǵdaı kezinde balalar juqpaly aýrýlar aýrýhanasyna eresekterge arnalǵan reanımatsııa kereýetteri asa qajet. Sondyqtan aýrýhana basshylyǵy «AıALA» qorynan kómek suraǵan bolatyn.
Demeýshi tappaǵan soń qor prezıdenti qajetti reanımatsııa kereýetteriniń jartysyn óz qarajatyna satyp alý jóninde sheshim qabyldady.
Jańa tórt sektsııalyq mamandandyrylǵan reanımatsııa kereýetteri Túrkııada jasalǵan. Olar júrek jáne ókpe jetkiliksizdigimen aýyratyn naýqasty barynsha yńǵaıly qalypqa avtomatty rejimde tez jáne qaýipsiz aýystyrýǵa múmkindik beredi. Ókpeniń jetkiliksizdigi kezinde shalqalap otyrý ókpege júktemeni azaıtady jáne jeńil tynys alýǵa múmkindik beredi.
Basqarý pýltteri arqa jáne jambas sektsııalaryn jeke-jeke jáne bir mezgilde arqa men jambas sektsııalarynyń bıiktigin avtomatty rejımde birge ózgerte otyryp retke keltirýge múmkindik beredi. Al kereýettiń akkýmýlıatory eger tipti aýrýhanada qandaı da bir sebeppen elektr bolmaı qalsa da emdelýshilerge tótenshe kómek kórsetiletinine kepildik beredi.
Almaty Qalalyq balalar klınıkalyq juqpaly aýrýlar aýrýhanasynyń basshylyǵy jan saqtaý bólimine eń ozyq jabdyq jetkizip únemi qoldaý kórsetkeni úshin «AıALA» qoryna alǵys bildirdi.
Osy qor jaqynda Almatynyń eresekterge arnalǵan qalalyq juqpaly aýrýlar aýrýhanasynyń jansaqtaý bólimine jalpy quny 30 mln teńge bolatyn 10 jańa reanımatsııa kereýetin tabystaǵan bolatyn.