Almatydaǵy avtoHQO-larda uzyn-sonar kezek nelikten qalyptasyp jatyr

ALMATY. QazAqparat – Almaty qalasy men onyń mańyndaǵy eldi mekenderde avtodromdardyń az bolýynan mamandandyrylǵan Halyqqa qyzmet kórsetý ortalyqtarynda uzyn-sonar kezek qalyptasyp jatyr. Bul týraly «Azamattarǵa arnalǵan úkimet» memlekettik korporatsııasy Almaty fılıalynyń baspasóz qyzmetinen málim etti, dep habarlaıdy QazAqparat tilshisi.

Almaty fılıalynyń málimetinshe, qalada ornalasqan 10 avtomekteptiń árqaısysy aı saıyn ortasha eseppen 300-350 kýrsantty daıyndap, qalada istep turǵan 2 avtodromǵa emtıhanǵa jiberedi. Bul avtodromdar qalanyń 2 mamandandyrylǵan HQO-da ornalasqan. Sol sebepti osy avtoHQO-lar aldynda uzyn-sonar kezek paıda bolady.

«Qazirgi tańda Almatyda 4 mamandandyrylǵan HQO bar, onyń tek ekeýinde avtodrom jumys isteıdi. Bul avtodromdarda júrgizý boıynsha emtıhandy tapsyrý kezinde adamı faktordy boldyrmaý úshin zamanaýı elektrondyq baqylaý júıesi qoldanylady. Sonymen qatar qazirgi tańda emtıhan tapsyrýshylardy aldyn ala jazý arqyly avtoHQO-lardaǵy kezekti rettep otyrmyz. Aıta keteıik, №1 mamandandyrylǵan HQO avtodromyna avtomattandyrylǵan jańa 2 kólikti iske qosqaly otyrmyz», - dedi «Azamattarǵa arnalǵan úkimet» memlekettik korporatsııasy Almaty qalasy fılıaly dırektorynyń orynbasary Ásem Bolatbekova.

Eske salsaq, mamyr aıynyń basyndaǵy mereke, demalys kúnderinen soń, qaladaǵy barlyq avtoHQO-larda uzyn-sonar kezek paıda bolǵan edi.

Aıta keteıik, Almatyda avtodromy bar №1 mamandandyrylǵan HQO Alataý aýdany, «Saıaly» shaǵynaýdany, Aqqaınar kóshesi, 1 mekenjaıynda, №6 mamandandyrylǵan HQO Jetisý aýdany, «Kemel» shaǵynaýdany, Aqsýat kóshesi, 118 mekenjaıynda ornalasqan.