Almatydaǵy aýrýhana qyzmetkerleri jappaı tártipsizdiktiń kezinde qalaı jumys istegen
Aýrýhananyń qabyldaý bólimshesine qysqa merzimde kóptegen jaraqat alǵan adamdar tústi. Ol týraly aýrýhananyń qabyldaý bólimshesiniń meńgerýshisi Baýyrjan Omarov aıtty.
«Túrli jaraqatpen túsken naýqastardy kim ekenine, qaı salada isteıtinine qaramaı, patsıent retinde qabyldaı berdik. Sebebi, dáriger qandaı jaǵdaı bolmasyn jáne kez kelgen sátte naýqasqa kómek kórsetýi tıis.
Aýrýhana basshylyǵy medıtsınalyq kómek brıgadasyn kúsheıtý týraly aldyn ala sheshim qabyldaǵan. Quramynda travmatolog, hırýrg, neırohırýrg, anestezıolog-reanımatolog jáne basqa da mamandar bar 5-6 brıgada daıyn boldy. Osymen jáne túsken naýqastardy jedel suryptaý júıesiniń arqasynda qyzmetkerlerdiń jumysynda retsizdik pen úreıge jol berilmedi.
Osy joly naýqastar kóbine oq jaraqatymen tústi, odan basqa da túrli jaraqattar boldy - granata synyqtarymen jaraqattalǵandar, gazben ýlanǵan adamdar, kesilgen nemese jarylǵan jaraqatpen túskender.
Aýrýhanadaǵy 9 ota jasaıtyn bólme úzdiksiz jumys istedi»,- dedi Baýyrjan Omarov.
1-sanatty hırýrg, jaýapty dáriger Murat Ahmetovtiń aıtýynsha, qańtardyń 4-nen 5-ne qaraǵan túni basshylyq dárigerlerdi qabyldaý bólimine kómekshi qol retinde jınaı bastaǵan.
«Solardyń ishinde men de boldym. Sol ýaqyttan bastap aýrýhanamyzdyń bosaǵadaǵy kúzet qyzmetkerleri, dárigerler, medbıkeler, tazalyqshy, sharýa bólimi damyl tapqan joq. Demalystaǵy dárigerler de keldi. Qabyldaý bólimi beıne bir soǵys alańyna aınalǵandaı boldy. Dárigerdiń anty boıynsha bizge beıbit sherýshi, qaraqshy, tártip saqshylary, áskerıler, barlyǵy - birdeı. Barlyǵyn birdeı jiti baqylaýǵa alyp, ota jasadyq.
Negizgi lek oq jaraqatynan týyndaǵan, bas mı, keýde jáne ish, qol-aıaqtyń aýyr jaraqattary boldy. Jansaqtaý ujymy úshin de bul asa qıyn sát boldy.
Basa aıtpaǵym, aýrýhana ujymy, meıli gınekolog bolsyn, nevropatolog, terapevt, jalpy hırýrgııa profılinen tys mamandar bizge syn saǵaty soqqanda zor demeý boldy.
Men áriptesterimdi maqtan tutam!
Elimizde tynyshtyq ornap, barshamyz aman bolyp, táýelsizdigimiz máńgi bolsyn degim keledi»,-degen tilegin jetkizdi Marat Ahmetov.
Qabyldaý bólimshesiniń aǵa medbıkesi Gúlzıra Muhamedjanqyzynyń aıtýynsha, 5 qańtar kúni tańerteń dalada otshashý atqandaı dybystar men adamdardyń shýlaǵandyǵy estilip jatqan.
«Jumysqa kelsem, áriptesterimniń túri sharshaǵan eken. Barlyq mán-jaıdy kúndelikti ótetin 5 mınýttyq jınalys barysynda túsindim. Túngi 1-2-lerden bastap aýrýhanaǵa oq jaraqattarymen naýqastar túsken eken... Sodan saǵat 9-10-dardan bastap, kezek-kezek oq jaraqatyn alǵan 5-10 naýqasqa deıin túse bastady. Ár jerinen - aıaǵynan, sanynan, keýde jaraqattary, bas jaraqattarymen túskender kóp boldy... 6-sy kúni de osyndaı jaǵdaı oryn aldy.
Keıin búlikshiler aýrýhanaǵa qaraı kele jatyr degen habar kelgende, qorqynysh sezimi paıda boldy. «Alla jar bolsyn», «Qudaı saqtaı gór» dep bilgen súrelerimizdi aıtyp, jumysymyzdy jalǵastyra berdik. Qabyldaý bóliminiń jaryǵyn óshirip, esigin japtyq. Túngi 2-3-terde tynyshtala bastady. Sodan tańǵy 4-ten bastap naýqastardy qaıtadan qabyldaı bastadyq.. 7 qańtar kúni 4 jasar qyz túskende, sol kúni jumysta bolǵan barlyq qyzmetkerlerdiń júregi aýyrdy... Sol kúni bárimiz jylap aldyq», - dedi Gúlzıra Muhamedjanqyzy.
Otalyq medbıke Aıtolqyn Beksultanovanyń aıtýynsha, tústen keıin naýqastardy birinen soń birin alyp kele bastaǵan.
«Sodan bastap tańǵa deıin úzilissiz qabyldadyq. Kishkene tynyshtaldy degen kez – 6-sy kúni tańǵy altylarda boldy. Ótken jaǵdaıdy sózben aıtyp jetkizý óte qıyn. Mundaıdy ómirimde birinshi ret kórdim.. Aýyr kúnder boldy. Teledıdardan burynǵy soǵys týraly fılmderdi kórýshi edik, endi óz kózimizben de kórdik. Áli kúnge deıin kózime jas keledi...
Mundaı jaǵdaı elimizde endi qaıtalanbasa eken dep tileımin»,- dedi otalyq medbıke.