Almatydaǵy atysta qaza tapqan polıtseılerdiń týystaryna memlekettik nagradalar tabys etildi

ALMATY. QazAqparat - Memleket basshysy Nursultan Nazarbaevtyń atynan Almatyda qyzmet barysynda qaza tapqan tártip saqshylarynyń týystaryna jáne qalalyq ІІD birqatar polıtseılerine orden men medaldar tabys etildi, dep habarlaıdy QazAqparat.

QR Táýelsizdiginiń 25 jyldyǵyna arnalǵan saltanatty sharada QR ІІM orynbasary polıtsııa general-maıory Berik Bısenqulov qyzmet babynda qaza tapqan polıtseılerdiń týystaryna nagradalardy tapsyrdy.

 

«Táýelsizdik jyldary qyzmet babyn orynbaý barysynda 837 ishki ister organy qyzmetkeri mert boldy, 3 myńnan astamy jaralandy. Kórsetken erligi úshin 1100 polıtseı memlekettik nagradaǵa ıe boldy, ókinishtisi, onyń 115-ine qaza tapqannan keıin marapattary tabys etildi. Polıtsııa kapıtany Ǵazız Baıtasov pen polkovnık Qaırat Úmbetov joǵary «Halyq Qaharmany» ataǵyna ıe boldy», - dedi B.Bısenqulov óz sózinde.

 

Іshki ister vıtse-mınıstri óz baıandamasynda Aqtóbe men Almatydaǵy qaıǵyly oqıǵada qaza tapqan jazyqsyz jandarǵa búkil Qazaqstan kóńil aıtqanyn, Memleket basshysy Іshki ister organdarynyń erlik kórsetken qyzmetkerlerin arnaıy marapattaǵanyn jetkizdi.

 

Naqtyraq aıtqanda, Elbasy Jarlyǵymen ІІ dárejeli «Aıbyn» ordenimen 5 qyzmetker, onyń 4-eýi qyzmet babynda mert bolǵan, ІІІ dárejeli «Aıbyn» ordenimen 10 qyzmetker, onyń 6-ýy qyzmet babynda qaza tapqan, «Erligi úshin» medalimen 9 qyzmetker jáne Ulttyq ulannyń 2 áskerı qyzmetshisi «Jaýyngerlik erligi úshin» medalimen marapattaldy.

Óz sózinde baıandamashy qaza tapqandardyń otbasylaryna ótemaqy jáne járdem berilgenin habarlady.