Almatydaǵy apatty úıdiń turǵyndary basqa jaqqa kóshirýdi talap etip otyr
Eski eki qabatty úıler Jetisý aýdany «Kemel» yqshamaýdany Dýlyǵa kóshesi №15 mekenjaıynda ornalasqan. Turǵyndardyń aıtýynsha, bul baspana 1950 jyly salynǵan. Munda jylý, gaz, ystyq sý múlde joq.
Osy úıdiń baıyrǵy turǵyny Elena Shelkovenko turǵyndardyń tek sýyq sý ǵana paıdalanatynyn jetkizdi. Elektr kerneýiniń álsizdiginen munda sý jylytatyn boıler qosý múmkin emes.
«Elektr jelisiniń kesirinen turǵyndardyń turmystyq tehnıkasy kúıip ketip jatyr. Tońazytqyshtar, qysqatolqyndy peshter, kir jýatyn mashınalar, kompıýterler jáne basqa da tehnıkanyń kúıi osyndaı. Sonymen qatar bizde gaz ballony tur. Mundaı úıde gaz ballonyn paıdalanýǵa bolmaıdy. Bizde osy ýaqytqa deıin eki ret órt shyqty. Abyroı bolǵanda kórshimiz dál ýaqytynda kelip, jarylystyń aldyn aldy. Ol gaz ballondaryn syrtqa shyǵaryp úlgerdi. Qazir úı qulaýǵa jaqyn. Qabyrǵalar únemi dymqyl bolyp turady. Tipti birinshi qabattaǵylar páterin aǵash jaǵyp jylytady»,- deıdi apatty úıdiń turǵyny Elena Shelkovenko.
Onyń aıtýynsha, qala bıligi turǵyndardyń óz qarajaty esebinen modernızatsııalaýdy usynǵan. Alaıda turǵyndar úıdiń qaıta qalpyna keltirýge jatpaıtynyn aıtady. Tipti, modernızatsııaǵa beretin aqshasy da joq. Munda kóbine zeınetkerler, kópbalaly otbasylar men jaldaýshylar turady.
«Bizdi basqa jerge kóshirsin nemese osy jerden jańa úı turǵyzyp bersin. Bizdiń qalaýymyz osy. Biz óz kúshimizben kireberiske jóndeý jumysyn júrgizdik, keıbir turǵyndar shatyrdy jamap jatyr. Biraq ol da kómektespeıdi. Báribir bir kúni qulaıdy. Men túnde elektr jylytqyshty qoldanam, páterimniń tóbesi opyrylyp túsetindeı kórinedi», - dep tolyqtyrdy Elena.
Sonymen qatar, turǵyndar munda egeýquıryqtar men taraqandardyń kóp ekenin aıtty.
Óz kezeginde jergilikti ákimdik bul úıdi «QR turǵyn úı-kommýnaldyq sharýashylyqty modernızatsııalaý - 2020» baǵdarlamasy boıynsha jańartýǵa bolatynyn aıtady.
«Osy baǵdarlama boıynsha kez kelgen úı ıesi hattama toltyryp, ony qalalyq turǵyn úı saıasaty bólimine ótkize alady. Onda olardy baǵdarlamaǵa qosyp, jobalyq-smetalyq qujattama jasaıdy. Osy jobanyń negizinde turǵyndar úıdiń qasbetin, kireberisin jáne shatyryn jóndete alady. Bul úılerdi modernızatsııalaýǵa bolady dep oılaımyn, óıtkeni bizde osy baǵdarlama boıynsha jańartylǵan úıler bar. Bul - memlekettik baǵdarlama. Munda aqsha qaıtarymdy negizde beriledi. Mysaly turǵyndar jóndeýdiń bir túrin tańdaıdy delik, memleket ony júrgizedi, biraq ár alań úshin turǵyndarǵa tóleý túbirtegi jiberiledi. Bul - paıyzsyz 8 jyldan 15 jylǵa deıingi jarna», - deıdi Jetisý aýdandyq ákimdigi kommýnaldyq sharýashylyq bóliminiń meńgerýshisi Qýanysh Seıtimbetov.
Onyń aıtýynsha, ótken jyldyń kókteminde ákimdik ókilderi ınvestorlarmen birge bul úılerdi tekserip, kórip shyqqan. Eki qabatty qos úı «Tozyǵy jetken úıler» baǵdarlamasyna engizildi. Qazir bul baǵdarlama boıynsha Jetisý aýdanynda 136 úı bar.