Almatydaǵy 14 qabatty turǵyn úı vıbrodınamıkalyq synaqtan ótkizildi

ALMATY. QazAqparat- Qazaq qurylys jáne sáýlet ǵylymı-zertteý jáne jobalaý ınstıtýtynyń mamandary Almatydaǵy 14 qabatty turǵyn úı keshenine vıbrodınamıkalyq jáne statıkalyq synaq jumystaryn júrgizdi, dep habarlaıdy QazAqparat tilshisi.

QazQSǴZI mamandarynyń aıtýynsha, synaq arqyly seısmıkalyq qaýipti aımaqtaǵy kópqabatty monolıtti úıdiń qurylys ereksheligi baǵalandy. Seısmıkaǵa tózimdi qurylys talaptarynyń erejelerine sáıkes, ǵımarattar men qurylys nysandarynyń jańa konstrýktıvti júıeleri, sondaı-aq jańa materıaldary men konstrýktsııalary jappaı qoldanylǵanǵa deıin tıisti tekserýden ótýge tıis.
Atalǵan synaq birneshe kezeń boıynsha ótkizildi. Ár kezeń saıyn turǵyn úıge túsetin júkteme arta berdi. Nátıjesinde salynyp jatqan ǵımarat 9 baldyq dúmpýlerge tótep berdi.
Onyń barysyn sarapshylar, BAQ ókilderi, ınjenerler men qurylysshylar baqylap otyrdy.
Synaq jumystaryn júrgizbes buryn ınstıtýt mamandary osy jobanyń eseptik derekterin muqııat zerttegeni.
«Bizdiń mindetimiz ǵımarattyń dınamıkalyq ólshemderiniń naqty mánderiniń (terbelis kezeńderi men formalary) eseptik kórsetkishterge sáıkestigin anyqtaý jáne qazir qoldanylyp júrgen normatıvtik derektermen salystyrý. Mundaı synaq qoldanystaǵy standarttardyń durystyǵyn baǵalaýǵa múmkindik beredi jáne osyndaı jaǵdaıdy eskerip, ózgerister men tolyqtyrýlar engizýge septigin tıgizedi. Búginde Qazaqstannyń qurylys normalary basqa postkeńestik eldermen salystyrǵanda áldeqaıda jaqsy»,-dedi Joǵary qabatty ǵımarattardyń seısmıkaǵa tózimdiligi zerthanasynyń meńgerýshisi Jasulan Omarov.
Aıtýynsha, mundaı vıbrodınamıkalyq synaq kúsh áseriniń ártúrli deńgeılerinde dızaınnyń jobalyq shemasyn anyqtaýǵa múmkindik beredi.