Almatyda jylytý maýsymy qashan bastalady

ALMATY. QazAqparat - Almatylyqtar qystyń qamyn jasady ma? Jylý qazandyǵy maýsymǵa shydas bere me? Qordalanǵan qaryz kommýnaldyq kásiporyndardyń jumysyna kedergi keltirmeı me? Bul saýaldardyń jaýaby óńirlik kommýnıkatsııalar qyzmetinde aıtyldy, dep habarlaıdy QazAqparat tilshisi. 

«Almaty jylý júıesi» JShS bas ınjeneri Dmıtrıı Kırdıaıkın habarlaǵandaı, Almatyda aýa temperatýrasy 5 kún boıy Tselsııa shkalasymen +8 gradýsqa jetkende, jylytý maýsymy bastalady. Birinshi kezekte balabaqshalar men mektepter, medıtsına mekemeleri men ákimshilik ǵımarattarǵa jylý berilip, qalǵan tutynýshylar 5-6 kún ishinde tolyq jylýmen qamtamasyz etiledi.

Qazir qalada kún raıy ashyq, jaqyn arada salqyndaýy ábden múmkin. 

«Normatıvtik qujattarǵa sáıkes, jylý aýa temperatýrasyna qaraı beriledi. Biz jylýdy 15 qazannan bastap beremiz»,- dedi qalalyq jolaýshylar kóligi jáne avtomobıl joldary basqarmasynyń basshysy Maqsut Isahov.

Onyń aıtýynsha, kommýnaldyq sharýashylyq obektilerin jáne áleýmettik sala mekemelerin qys maýsymyna daıyndaýǵa bıýdjetten 36 mlrd teńge jáne tabıǵı monopolııa sýbektileriniń óz qarjysynan 27,5 mlrd teńge qarastyrylǵan.