Almatyda jylý energııasynyń tarıfi qymbattamaıdy

ALMATY. QazAqparat – Almatyda jylý energııasynyń tarıfi ózgerissiz qaldy. Bul týraly Tabıǵı monopolııalardy retteý komıteti Almaty qalasy boıynsha departamenti basshysynyń mindetin atqarýshy Tımýr Qalenov onlaın brıfıngide málim etti, dep habarlaıdy QazAqparat tilshisi.

Onyń aıtýynsha, 2021 jylǵy 1 qańtardan bastap jylýmen jabdyqtaýǵa arnalǵan tarıftiń josparly 14% - ǵa ósýi kútilgen. Alaıda, Memleket basshysynyń halyq úshin tarıfterdiń ósýine jol bermeý týraly tapsyrmasyn oryndaý úshin energııa kózderindegi tarıfter tómendetildi.

«2020 jyly halyq úshin jylý energııasyna tarıf ózgergen joq - 4294,6 teńge. Budan basqa, halyqqa arnalǵan tarıfter kórsetiletin qyzmetter kóleminiń ósýine baılanysty 2020 jylǵy 1 naýryzdan bastap -2% -ǵa, sondaı-aq 2020 jylǵy 1 sáýir men 31 tamyz aralyǵynda 10% -ǵa tómendedi, ásirese tótenshe jaǵdaı kezinde ystyq sý tarıfi tómendedi, - deıdi Tımýr Qalenov.

Bıyl 1 aqpannan bastap halyq úshin jylýmen jabdyqtaýǵa arnalǵan tarıf 3%-ǵa azaıady. Sonyń arqasyn 552 mln teńge únemdeledi.

Sonymen qatar, ol departament 2020-2024 jyldarǵa arnalǵan sýmen jabdyqtaý jáne sý burý qyzmetterine tarıftiń shekti deńgeıin bekitkenin jetkizdi.

«Soǵan sáıkes sýmen jabdyqtaý qyzmetteri boıynsha halyq úshin tarıf 44,65 teńge/m3 kezinde 4% -ǵa 42,86 teńge/m3 deıin, sý burý qyzmetteri boıynsha tarıf 23,14 teńge/m3 mólsherinde 0,1% -ǵa 23,12 teńge/m3 deıin tómendedi. Sonymen qatar, 2020 jylǵy 1 sáýir men 31 tamyz aralyǵynda sýmen jabdyqtaý jáne sý burý tarıfteri tótenshe jaǵdaı kezinde 10% -ǵa azaıdy», - dedi ol.