Almatyda jyldar boıy qaraýsyz qalǵan jerler abattandyrylyp jatyr

ALMATY. QazAqparat - Almaty ákimi Baqytjan Saǵyntaev Naýryzbaı men Alataý aýdandaryndaǵy sý daıyndaý stantsııasy men ınjenerlik jeliler qurylysynyń barysymen tanysty, dep habarlaıdy QazAqparat tilshisi.

Naýryzbaı aýdanynda «Qarǵaly» sý jınaý nysany men sý daıyndaý stantsııasynyń qurylysy júrip jatyr. Jospar boıynsha negizgi jumystar jyl sońyna deıin aıaqtalýy tıis.

Qala ákimi «Quramys» shaǵyn aýdanyndaǵy qurylys jumysy aıaqtalǵannan keıingi qalpyna keltirilgen 10 shaqyrym joldyń sapasyn tekserdi.

Alataý aýdanyndaǵy «Samǵaý» shaǵyn aýdanynda jıi óshetin elektr qýatyndaǵy aqaýlar joıyldy.

Qala ákimi jaǵdaıdy baqylaýda ustaýdy tapsyrdy. Turǵyndardyń ótinishi boıynsha 30 úıge káriz jelisin júrgizý jobasy ázirlenedi. Sondaı-aq balalar alańyn salý múmkindigi qaraldy.

«Qarasý» yqshamaýdanyda 26,6 shaqyrym sý qubyry men 22,6 shaqyrym káriz jelisiniń qurylysy aıaqtalýǵa jaqyn.

Qala ákimi jol tósemin qalpyna keltirý jumysynyń sapasyn baqylaýdy tapsyrdy.

Sondaı-aq, qala ákimi abattandyrylǵan qoǵamdyq keńistikti aralap kórdi. Naýryzbaı aýdanyndaǵy Tájıev kóshesinde «Bıýdjetke qatysý» jobasy boıynsha fýtbol, balalarǵa arnalǵan oıyn men sport alańdary bar qoǵamdyq keńistik abattandyryldy.

Alataý aýdanyndaǵy «Uljan-1», «Ulajan-2» shaǵyn aýdandary arasynda jaıaý júrginshiler aımaǵy salyndy.

Ondaǵan jyl qaraýsyz jatqan jer abattandyryldy. Qazir munda fýtbol alańy, ózen ústindegi kópir men balalar oıyn alańy salyndy.