Almatyda jyl sońyna deıin Esentaı men Qarasý ózenderiniń arnalaryn qaıta qalpyna keltirý jumystary aıaqtalady (FOTO)
Almaty qalasy tabıǵı resýrstar jáne tabıǵatty paıdalanýdy retteý basqarmasy sý obektilerin jáne jer qoınaýyn paıdalanýdy retteý bóliminiń basshysy Aıdyn Temeshevtiń aıtýynsha, bul eki ýchaskede 66 turǵyn úı men 48 azyq-túlik bazasyn sý basý qaýpi bar.
Esentaı ózeniniń Raıymbek dańǵyly men Angarskıı kóshesi aralyǵyndaǵy ýchaskesi qaıta jańǵyrtylady. Uzyndyǵy - 4,5 shaqyrym. Bul ýchaskede ózenniń tabany tereńdetilip, jaǵasy temirbetonmen jáne gabıondy qurylymdarmen nyǵaıtylady.
Jergilikti bıýdjetten bul maqsatqa - 640 mln. jýyq teńge bólindi. Merdigerlik uıym - «Spetsstroı Kompanııasy» JShS. Qaıta jańǵyrtý jumystary qazir bastalyp ta ketti. Ol bıylǵy jyldyń jeltoqsan aıyna deıin jalǵasady.
«Raıymbek dańǵylynan Rysqulov dańǵyly aralyǵynda negizinen jeke turǵyn úıler, zırat, óndiristik bazalar ornalasqan. Al Rysqulov dańǵyly men Markelov kóshesi aralyǵynda turǵyn úıler ózen arnasyna óte jaqyn ornalasqan. Onyń ústine bul aýmaqta qoımalar, bazarlar bar. ıAǵnı, óte qaýipti ýchastok. 450 jeke turǵyn úı bar. Sel bola qalsa, bul úıderdi sý basýy múmkin. Biz qazir
Almaty qalasy memlekettik sáýlet-qurylys baqylaýy basqarmasynyń tıisti ruqsatyn aldyq. Endi ózen arnasynda ósip turǵan, qurylysqa kedergi keltiretin 170 aǵashtar alynyp tastalady», - dedi ol.
Al Qarasý ózenindegi qaıta jańǵyrtý jumystary Ippodrom men Erjanov kóshesi aralyǵyndaǵy ýchaskesinde júrgiziledi. Uzyndyǵy - 4,2 shaqyrym. Jospar boıynsha ózenniń tabany tereńdetilip, jaǵasy nyǵaıtylady. Jergilikti bıýdjetten bul jumystarǵa - 540 mln. teńge bólindi. Jumys aldaǵy jeltoqsan aıynda aıaqtalady.
«Jóndeý jumystary barysynda kommýnıkatsııa jelisi óshirilmeıdi. Esentaı ózeni boıynsha jelilerdiń orny aýystyrylady. Biraq, bul jóninde menshik ıelerimen aldyn ala kelisip alynady», - dedi A. Temeshev.