Almatyda jyl sońyna 3 mektep paıdalanýǵa berilmek

ALMATY. QazAqparat – Megapolıste 8 mekteptiń qurylysy júrip jatyr. Onyń úsheýi jyl sońyna deıin paıdalanýǵa beriledi. Bul týraly Almaty qalasy Bilim basqarmasy basshysynyń orynbasary Qaırat Jumanov málim etti, dep habarlaıdy QazAqparat tilshisi.

Onyń aıtýynsha, 2025 jylǵa qaraı elimizde myń bilim berý mekemesi salynýy tıis. Prezıdent Qazaqstan halqyna Joldaýynda osyndaı mindet qoıdy.

«Memleket basshysynyń «Halyq birligi jáne júıeli reformalar — eldiń órkendeýiniń berik negizi» atty Qazaqstan halqyna Joldaýyn iske asyrý aıasynda Almaty Bilim basqarmasy josparly jumys júrgizýde. Karantındik shekteýlerge qaramastan, oqýshy oryndarynyń tapshylyǵyn azaıtý jáne bilim berý mekemeleriniń jelisin odan ári keńeıtý maqsatynda qazirgi ýaqytta 12 600 oryndyq 8 memlekettik mekteptiń qurylysy júrgizilýde. Alataý aýdanynda bes jańa mektep, Naýryzbaı aýdanynda taǵy eki, Túrksib aýdanynda bir jańa mektep ashylady. Salynyp jatqan mektepterdiń úsheýi 2021 jyldyń sońynda paıdalanýǵa beriledi (Tomırıs, Saıaly jáne Qalqaman-2 shaǵyn aýdandarynda) «, - dedi Qaırat Jumanov.
Osylaısha jyl sońyna deıin 16 myńnan astam oqýshy jańa orynmen qamtylmaq.
« Taǵy bir aıta ketetin jáıt, bıyl almatylyq qurylysshylar №7, 40, 45, 54 jáne 81 mektep ǵımarattaryn qalpyna keltirý jáne seısmıkalyq nyǵaıtý jumystaryn júrgizedi»,-dedi ol.
Qazir muǵalimder úsh jylda bir tegin kýrs ótkizip turý tapsyrmasy berilgen. Sondyqtan bul kýrstar QR bilim jáne ǵylym mınıstrligi jáne Órleý ortalyqtarymen iske asyrylady»,-dedi spıker.