Almatyda jyl basynan beri jol apatynan 107 bala zardap shekti

ALMATY. QazAqparat - Almatyda jyl basynan beri jol-kólik oqıǵasynan 107 bala jaraqat alyp, 1 bala qaza tapty, dep habarlaıdy QazAqparat tilshisi.

Almaty qalalyq Polıtsııa departamentiniń málimetinshe, osy jyldyń 2 aıynda Almaty joldarynda kámeletke tolmaǵandardyń qatysýymen 95 jol-kólik oqıǵasy tirkeldi, sonyń saldarynan 107 bala jaraqat alyp,1 bala qaza tapty.
«Analıtıkalyq málimetterge sáıkes, balalar kóbinese joldyń júrý bóligin kesip ótý kezinde zardap shegedi. Kámeletke tolmaǵandardyń qatysýymen bolǵan jol kólik oqıǵalarynyń basym bóligi tańǵy saǵat 06:00 men keshki saǵat 18:00 aralyǵynda oryn aldy. Kóbinese jol-kólik oqıǵalaryna 16-17 jas (30 jol-kólik oqıǵasy), 12-13 jas (13 jol-kólik oqıǵasy), 10-11 jáne 14-15 jas (11 jol-kólik oqıǵasy) aralyǵyndaǵy balalar túsedi»,-dep atap ótti qalalyq PD baspasóz qyzmetinen.
Almaty polıtsııasy, jolda júrý erejelerin naqty bilý jáne buljytpaı saqtaý – balańyzdyń qaýipsizdigi men densaýlyǵynyń kepili ekenin eske salady.