Almatyda jyl basynan beri 696 adam kópbalaly otbasy mártebesine ıe boldy
«Azamattarǵa arnalǵan úkimet» memlekettik korporatsııasynyń Almaty qalalyq fılıalynda habarlaǵandaı, ótken jyldyń mamyr aıynan bastap áıelderge tórtinshi nemese odan kóp balany týǵanda taǵaıyndalatyn járdemaqyny alý úshin HQO-ǵa júginý mindetti emes.
Memleket barlyǵyn qashyqtan SMS habarlama arqyly resimdeýdi usynady. Budan buryn atalǵan járdemaqyny resimdeý úshin HQO-ǵa baryp, ótinish jazyp, jeke kýálik, balalardyń týý týraly kýálikteri men neke qııý kýáligi sııaqty qujattardy usyný qajet edi. Al járdemaqy ótinish berilgen kúnnen bastap taǵaıyndalatyn. Al qazir kóp balaly otbasylar úshin járdemaqyny resimdeýdi usynatyn SMS-habarlama da jiberiledi.
«Munda klıenttiń SMS-ke kelisimi ǵana kerek. Qajetti málimetter memlekettik organdardyń aqparattyq júıelerinen alynady. HQO-ǵa barýdyń qajeti joq. Telefon nómiri azamattardyń mobıldik bazasynda tikelgen bolsa jetkilikti. Aǵymdaǵy jyldyń 2 aıynda mundaı járdemaqyny 696 almatylyq otbasy aldy. Onyń 318-i proaktıvti túrde rásimdegen. «Altyn« jáne «kúmis« alqamen marapattalǵan 100 almatylyq ananyń 80-i qujattaryn proaktıvti túrde rásimdegen», – dedi «Azamattarǵa arnalǵan úkimet» memlekettik korporatsııasy Almaty qalasy fılıaly dırektorynyń orynbasary Farıda Bokıjanov.
Aıta keteıik, kóp balaly otbasylar úshin járdemaqy 2020 jyldyń basynan bastap tólenedi. Qazaqstanda 4 jáne odan kóp kámeletke tolmaǵan balalary nemese 23 jasqa tolǵanǵa deıin kúndizgi bólimde oqıtyn birge turatyn balalary barlar - kópbalaly otbasy bolyp sanalady.
6 bala týǵan jáne tárbıelegen kópbalaly analarǵa «Kúmis alqa», al 7 jáne odan da kóp bala týyp, tárbıelegenderge «Altyn alqa» beriledi. Oǵan tólenetin járdemaqy mólsheri 19604 teńge.
«Kúmis alqa» belgisi úshin járdemaqyny rásimdeýge HQO-ǵa barýdyń qajeti bolmady. Járdemaqyny resimdeýdi usynǵan SMS-habarlama keldi, soǵan kelisimim jetkilikti boldy. Ýaqyt ketirip, qujat jınap júgirmedim. Qazirgi ýaqytta eń bastysy telefon nómirińiz mobıldi azamattar bazasynda tirkelgen bolsa jetkilikti eken. Óte yńǵaıly», - dedi kóp balaly ana Ásel Sábıtova.
Qazirgi ýaqytta bul járdemaqyny 487 myńnan astam qazaqstandyq otbasy alady. Onyń ishinde 63 437 áıel «Altyn alqa», 138 571 áıel «Kúmis alqa» ıegerleri.
2022 jyly kóp balaly otbasylarǵa taǵaıyndalatyn járdemaqy mólsheri:
4 balaǵa 49 100 teńge;
5 balaǵa 61 383 teńge;
6 balaǵa 73 666 teńge;
7 balaǵa 85 948 teńge;
8 balaǵa 98230 teńge;
Kelesi ár balaǵa +4 AEK boldy.
Tólemdi tórt jáne odan da kóp bala týǵan áıelder ala alady.
1414 nómirinen qyzmetterdi proaktıvti túrde rásimdeýdi usynatyn sms-habarlamalardy alý úshin telefon nómiri mobıldi azamattar bazasynda tirkelýi tıis. Tolyq aqparatty 1414 nómiri boıynsha bilýge bolady.