Almatyda jyl basynan beri 2 bala jol apatynan qaza tapqan
Bul týraly qalalyq polıtsııa departamenti ákimshilik polıtsııa basqarmasy basshysynyń orynbasary Bolatbek Baıatanov málimdedi.
«Jyl basynan beri balalardyń qatysýymen 188 jol-kólik oqıǵasy tirkeldi. Saldarynan eki bala qaza taýyp, 208 bala jaralandy»,-dedi ol.
Spıkerdiń sózinshe, Almatyda «Nazar aýdaryńyz! Balalar!» jedel aldyn alý sharasy ótken.
«Atalǵan naýqan aıasynda qalanyń búkil bilim mekemelerinde jol qaýipsizdigi talaptaryna sáıkestigi tekserildi. Qajetti jerlerde jol belgileri, jyldamdyq shektegishter, retteletin baǵdarshamdar ornatylyp, jol belgileri jańartylyp jatyr. Sonymen qatar, oqý oryndarynda oqytýshylar ujymymen, ata-analarmen, oqýshylarmen profılaktıkalyq áńgimele júrgizilýde. Qoǵamdyq kólikte, kınoteatrlarda balalardyń jol-kólik jaraqatynyń aldyn alý boıynsha beınerolıkter kórsettik», - dedi Almaty qalalyq PD ákimshilik polıtsııa basqarmasy bastyǵynyń orynbasary Bolatbek Baıatanov.
Sonymen qatar, ol jazǵy demalys qarsańynda balalardy demalys oryndaryna tasymaldaıtyn kólikterge tehnıkalyq tekserý júrgiziletinin tilge tıek etti.
Sondaı-aq ishinde balalar bar, avtobýstardyń árqaısysyna patrýldik polıtsııa ekıpajdary ilesip júretin bolady.
«Osy múmkindikti paıdalana otyryp, ata-analar men balalardy jazǵy demalys kezinde jol qozǵalysy erejelerin qatań saqtaýǵa shaqyramyn, bul - olardyń jeke qaýipsizdiginiń kepili», - dedi spıker.