Almatyda júrgizýshi iri jol apatyn jasap, oqıǵa ornynan qashyp ketken

ALMATY. QazAqparat – Almatyda túngi ýaqytta iri jol apatyn jasaǵan júrgizýshi oqıǵa ornynan jaıaý qashyp, jasyrynyp úlgerdi, dep habarlaıdy QazAqparat tilshisi.

Almaty qalalyq polıtsııa departamentiniń málimetinshe, 5 qyrkúıek túngi saǵat 1:35-te Áýezov aýdanynda iri jol apaty boldy. «Mersedes» markaly avtokólik Saıyn kóshesimen soltústik baǵytta kele jatyp, «Nıssan», «Mersedes», «Toıota Lend Krýzer Prado», «Shevrole» kólikterimen soqtyǵysqan. Júrgizýshi oqıǵa ornynan jaıaý qashyp ketip, jasyrynyp úlgerdi.

«Qazirgi ýaqytta júrgizýshiniń kim ekeni anyqtaldy. Ony ustaýǵa tıisti sharalar qabyldanyp jatyr. Jol apatynan «Nıssan» avtokóliginiń júrgizýshisi men jolaýshysy zardap shekti. Atalǵan derek Áýezov aýdany polıtsııa basqarmasy qyzmetkerlerimen óndiriske qabyldandy», - dep habarlady qalalyq polıtsııa departamentiniń baspasóz qyzmetinen.