Almatyda júrdek avtobýstar jelisi salynady
Júrdek avtobýstardyń júıesin salý týraly másele 2013 jyly kóterilgen bolatyn. BRT qurylysyn «Almatynyń turaqty kóligi» BUU damý baǵdarlamasy, Ǵalamdyq ekologııalyq qory usynǵan bolatyn.
«Qazir Baıtursynov, Tımırıazev, Jandosov kósheleri tolyǵymen qaıta jasalyp jatyr. Jóndeý jumystary bitken soń atalǵan kóshelerde BRT jelisi júredi. Basty maqsat - adamdarǵa yńǵaıly kólik ınfraqurylymyn jasaý. Baıtursynov kóshesi shamaly tarylady. Osylaısha jeke kólikterge yńǵaısyzdyq týady. Biz Eýropa tájirıbesimen jasap otyrmyz. Baıtursynov kóshesin keńitetin bolsaq, myńdaǵan aǵash otalatyn edi. Biz kerisinshe ol jerde velojúrginshilerge jaǵdaı jasap jatyrmyz. Bul kóshe jaıaý júrginshilerge yńǵaıly bolady», - dedi qalalyq Sáýlet jáne qala qurylysy basqarmasy basshysynyń mindetin atqarýshy Almashan Ahmedjanov.
Júrgizilgen taldaýlardyń nátıjesinde Almaty qalasynyń kólik júıesi aglomeratsııasynyń negizgi máselesi qalalyq jáne qala shetindegi júrdek jolaýshy kóliginiń (LRT, BRT, qala shetindegi elektrıchkalar) zamanaýı júıeleriniń joqtyǵy anyqtalǵan. Qala mańyndaǵy baǵyttarda jolaýshylar tasymaldaýdyń bar qajettilikterin qanaǵattandyratyn avtomobıl kóliginiń balamasy joq.
BRT júrgizý - Almatynyń 2020 jylǵa deıin damý baǵdarlamasynyń bir baǵyty bolyp otyr.
Atalǵan baǵdarlama 2015 jyly qabyldanǵan bolatyn. Qujatta Almatynyń ekonomıkalyq, ekologııalyq, áleýmettik damýy jan-jaqty qarastyrylǵan.
Baǵdarlamaǵa sáıkes Qala boıynsha qozǵalystyń ortasha jyldamdyǵy 2020 jyly 19 km/saǵattan 25 km/saǵatqa deıin artýy tıis.
Osy máseleniń oń sheshimi retinde qala ákimdigi BUUDB-men birge ázirlengen Almaty qalasynyń kólik Strategııasyn júzege asyra bastady.
Ondaǵy basty maqsat - qaladaǵy jaıaý júrginshilerge jaǵdaı jasap, kólik júktemesin azaıtý.
Jobaǵa sáıkes BRT júrdek avtobýstarynyń jyldamdyǵy saǵatyna 21 km bolmaq.Salystyrmaly túrde aıtsaq, qazir qoǵamdyq kólikterdiń ortasha jyldamdyǵy saǵatyna 13 km.
Joba menedjeri Elena Erzakovıchtiń aıtýynsha, keptelisti azaıtý maqsatynda BRT joldary joldyń ortasynda, al Qulja jáne Shyǵys aınalma jolynda joldyń shetinde ornalasatyn bolady.
«Panfılov, Jibek joly, Qabanbaı batyr, Gogol kóshelerindegi jaıaý júrginshi aımaqtary júıeli túrde ózgeristerge kóshýdiń bastamasy bolady. Osy kóshelerden adamdar kez-kelgen jerge bara alatyn bolady», - dedi Almashan Ahmedjanov.
BRT jelisinde 2 sektsııaly 18 metrlik júrdek avtobýstar paıdalanylady. Alǵashqy baǵdar 8,5 shaqyrymdyq baǵyt Orbıta aýdanynan Jandosov, Tımırıazev, Baıtursynov kóshelerimen qalanyń ortalyǵyna deıin jetedi.