Almatyda jumys isteıtin jastarǵa qalaı baspana alýǵa bolady
Memleket basshysy byltyr Almaty turǵyndarymen kezdesýi barysynda, jastar úshin baspana – eń ózekti másele ekenin bas aıtqan bolatyn.
«Bul – memlekettiń basty mindetiniń biri. Ákimdik jalǵa beriletin turǵyn úı salý úshin ınvestorlarǵa tartymdy bolatyn tıimdi tásilder oılastyrýǵa tıis. Biraq, jaldamaly úıler tym qymbatqa túspeýi kerek. Ondaı páterler, eń aldymen, qoljetimdi bolýǵa tıis. Jalpy, Almaty jastary úshin baspanaly bolý qol jetpes arman bolmaýy kerek. Basynda baspanasy bar jastardyń erteńgi kúnge degen senimi artady. Qalada turǵyn úı tapshylyǵyn azaıtý – asa mańyzdy mindet. Kelesi jyldan bastap turǵyn úı qurylysyn jyl saıyn 10 paıyzǵa arttyrý qajet. Árıne, Almatyda bos jer az. Bul jaǵdaı qurylystyń qarqynyn kúsheıtýge kedergi keltirýi múmkin. Sol sebepti, jańa jerlerdi ıgerý kerek. Qalada 1500-ge jýyq eski úı bar. Shaǵyn aýdandarda turǵan mundaı úılerge kúrdeli jóndeý júrgizgen jón. Ákimdikke osy sharýany kezeń-kezeńimen júzege asyrý úshin naqty jospar ázirleýdi tapsyramyn», - degen edi Qasym-Jomart Toqaev.
Megapolıstegi «Almaty jastary» baǵdarlamasy aıasynda bıyl 1 100 almatylyq jas baspanaly bolady.
Almaty qalasy ákimdiginiń málimetinshe, qalalyq turǵyn úı baǵdarlamasyna bilim, densaýlyq saqtaý, áleýmettik, kommýnaldyq qyzmetter, joǵary oqý oryndary men ǵylymı-zertteý ınstıtýttary, quqyq qorǵaý organdary, mádenıet, BAQ jáne sport salasynyń qyzmetkerlerinen barlyǵy 11 104 ótinim kelip tústi. Olardyń talaptarǵa sáıkestigi tekserilip, nátıjesinde 3 631 ótinim maquldaý aldy.
Baǵyttar boıynsha jınaǵan upaılaryna baılanysty 1 100 úmitkerge saıttaǵy jeke kabınetke «Otbasy bank» AQ-da tólem qabilettiligin rastaý úshin joldama beriletin bolady. Joldama alǵan ótinish berýshiler tólem qabilettiligin baǵalaýdan ótý úshin 15 jumys kúni ishinde «Otbasy bank» AQ-nyń kez kelgen qyzmet kórsetý ortalyǵyna júginýi qajet. Tólem qabilettiligin sátti rastaǵan qatysýshylar 45 kúntizbelik kúnde bastapqy jáne qaıtalama naryqtardaǵy turǵyn úıdi tańdaı alady. Oń baǵalanǵan qalǵan 2 531 qatysýshy negizgi tizim tólem qabilettiliginen ótkenge deıin rezervte bolady.
«Almaty jastary» baǵdarlamasy 2017 jyly bastalǵan bolatyn. Qazirgi tańda qalanyń jas turǵyndary arasynda óte tanymal. Osy ýaqyt aralyǵynda biz qala basshylyǵymen birlesip 3 393 jas azamatty 52,5 mlrd teńgege baspanamen qamtamasyz ettik. Bıyl baǵdarlamany júzege asyrýǵa 20 mlrd teńge bólindi, onyń 17 mlrd teńgesi – qalalyq bıýdjetten, 3 mlrd teńgesi – Otbasy bankinen. Bul qarajat 1 100 almatylyq turǵynnyń baspana máselesin sheshýge múmkindik beredi», - dep túsindirdi «Otbasy bank» AQ qalalyq fılıaly dırektorynyń orynbasary.
Budan bólek, byltyr túrli jeńildetilgen memlekettik baǵdarlamalardy júzege asyrýdyń arqasynda Almatyda kópbalaly jáne az qamtylǵan otbasylar men jumysshy jastardy qosqanda 3 167 adam páterli boldy.
«Shańyraq» (5-10-20) jáne «Baqytty otbasy» (2-10-20) nesıelik baǵdarlamalar boıynsha turǵyn úıdi tıisinshe 1988 jáne 162 adam satyp aldy. «Almaty jastary» baǵdarlamasyna 971 adam qatysty. Jaldamaly baspana alý quqyǵyn 46 almatylyq paıdalandy.
Ákimdikte esepte turǵan, turǵyn úıge muqtaj azamattar «Shańyraq» pılottyq jobasynyń qatysýshylary bola alady. Sońǵy alty aıdaǵy árbir otbasy múshesiniń tabysy aıyna 3,7 eń tómengi kúnkóris deńgeıinen aspaýy kerek. Turǵyn úıdi kez kelgen jańa turǵyn úı nysandarynan satyp alýǵa bolady. Olardy ákimdikter, «Shańyraq» baǵdarlamasy aıasynda da, jeke qurylys júrgizýshiler de sala alady. Turǵyn úıdi úlestik qatysý sharty boıynsha da satyp alýǵa bolady (paıdalanýǵa berilmegen), biraq qurylys salýshyda turǵyn úı qurylysynyń Biryńǵaı operatory – «Qazaqstandyq turǵyn úı kompanııasy» AQ kepildigi bolýy kerek.
«Baqytty otbasy» baǵdarlamasyna turǵyn úıge kóp balaly otbasylar, І jáne ІІ toptaǵy múgedek adamdar, jetim balalar jáne múgedek balalary bar nemese olardy tárbıelep otyrǵan otbasylar úmitker bola alady. Turǵyn úıdi ótinish berýshi ákimdikte kezekte turǵan aımaqta ǵana satyp alýǵa bolady. Kezek tizimin «Shanyraq» bólimindegi kezekte.kz veb-saıtynan tekserýge bolady. Negizgi tabys bolǵan jaǵdaıda nesıe beriledi. Negizgi tabys eńbek nemese kásipkerlik qyzmetten túsetin bolýy kerek. Osy baǵdarlamalarǵa qatysý sharttary týraly tolyǵyraq aqparat banktiń saıtynda jarııalanǵan.
Almaty qalasynyń ákimdigi turǵyn úıge muqtaj azamattarǵa kórsetiletin kómek kólemin dáıekti túrde arttyryp keledi. 2023 jyly memlekettik baǵdarlamalar boıynsha 5 266 adamdy turǵyn úımen qamtamasyz etý josparlanǵan:
- «Shańyraq» jáne «Baqytty otbasy» baǵdarlamalary boıynsha nesıelik turǵyn úıdi 2 715 otbasy alady;
- 401 otbasyǵa (kópbalaly otbasylarǵa - 185 páter, halyqtyń áleýmettik osal toptaryna - 216 páter) jalǵa beriletin páter beriledi;
- «Almaty jastary» baǵdarlamasyn keminde 1 100 adam paıdalanady (ákimniń sheshimimen 2023 jyldan bastap densaýlyq saqtaý jáne bilim berý salasynyń qyzmetkerleri úshin 100 páterge kóbeıtildi);
- 29 jasqa deıingi jumys isteıtin jastar úshin 1 050 páterdi jalǵa beriledi.
Aıta ketsek, búginde Almatyda turǵyn úıge kezeginde 38 139 azamat tur.