Almatyda jóndelip bitpegen mektep oqýshylary basqa bilim mekemesine baryp oqıdy

ALMATY. QazAqparat - Megapolıstegi №127 jáne №70 jalpy bilim beretin mektepterdegi jóndeý jumystary kestege sáıkes, jeltoqsan aıynda aıaqtalady. Ol ýaqytqa deıin oqýshylar jaqyn mańdaǵy mektepte oqıdy. Oqýshylardyń sapaly bilim alýyna eshqandaı kedergi keltirilmeıdi. Bul týraly Almaty qalasy Bilim sapasyn qamtamasyz etý departamentiniń basshysy Gúlnar Ermekbaeva aıtty, dep habarlaıdy QazAqparat tilshisi.

Almaty qalasynyń bilim basqarmasyna qarasty 214 memlekettik bilim berý uıymdarynyń 2023-2024 oqý jylyna daıyndyǵyn anyqtaý maqsatynda monıtorıng júrgizildi.

«Almaty qalasynda mektepterdiń 68 paıyzynda aǵymdaǵy jóndeý jumystary aıaqtalǵan. Jańa oqý jylynyń bastalýyna daıyn. Qalǵan mektepterde 25 tamyzǵa deıin aıaqtalýy kerek, alaıda konkýrstyq protsedýranyń keshigip ótkizilýine baılanysty keıbir mektepterde jóndeý jumystary keshigip bastalǵan», - dedi Gúlnar Ermekbaeva óńirlik kommýnıkatsııalar qyzmetinde ótken baspasóz máslıhatynda.

Spıkerdiń sózinshe, josparǵa sáıkes kelesi bilim berý mekemelerinde kúrdeli jóndeý jumystary aıaqtalyp, jańa oqý jylyna oqýshylardy qabyldaýǵa daıyndyq júrgizilip jatyr: №80 jalpy bilim beretin mektep; Baýyrjan Momyshuly atyndaǵy №131 Gımnazııa; №48 mektep-gımnazııa; №15 mektep-gımnazııa; №141 jalpy bilim beretin mektep; Bilim ınnovatsııa lıtseıi.

«Oryn tapshylyǵyn azaıtý maqsatynda №48 mektep-gımnazııada jáne №148, №112, №9 mektep-ınternatynda 920 orynǵa arnalǵan qosymsha ǵımarattar salynyp, iske qosyldy. Sonymen qatar, áli de kúrdeli jóndeý jumystary josparǵa sáıkes júrgizilip jatqan obektiler bar. Ol - №127 jáne №70 jalpy bilim beretin mektepter. Jumystardy jeltoqsan aıynda aıaqtaý josparlanǵan. Apatty jaǵdaıda dep tanylǵan №59 mektep-gımnazııasynyń bir oqý ǵımaraty, sport zal jáne ashana ǵımaraty súrilip, ornyna 300 orynǵa arnalǵan jańa ǵımarat salý jáne eski ǵımaratqa qaıta jóndeý jumystaryn ótkizilip jatyr. Sondaı-aq, №9 jalpy bilim beretin mekteptegi jóndeý jumystary 2024 jyly aıaqtalady», - dedi spıker.

Departament basshysynyń aıtýynsha, osy atalǵan bilim berý uıymdarynyń oqýshylaryna jaqyn mańaıda ornalasqan mektepterde jóndeý jumystary aıaqtalǵanǵa deıin bilim alýǵa jaǵdaı jasaldy. Oqýshylardyń sapaly bilim alýyna eshqandaı kedergi keltirilmeıdi.

«№97 jáne №154 jalpy bilim beretin mektep ǵımarattaryna kúrdeli jóndeý jumystaryn júrgizilýine jaramsyz bolǵandyqtan, súrilip, ornyna «Jaıly mektep» jobasynyń negizinde jańa ǵımarat salý jumystary josparlandy. Sondaı-aq, monıtorıng qorytyndysy boıynsha kúrdeli jóndeý jumystaryn júrgizý qajet dep tanylǵan bilim uıymdarynyń tizimi jasaldy», - dep túsindirdi Gúlnar Ermekbaeva.