Almatyda jol talǵamaıtyn kólik «Sergek» kameralaryn aldamaq bolǵan
Polıtsııanyń málimetishe, 35 jastaǵy «Nıssan Patrol» avtokóliginiń júrgizýshisi jol qozǵalysy erejelerin buza otyryp, jazadan jaltarý maqsatynda kóliktiń aldyńǵy nómirin aýdaryp júrgen.
«Sergek» avtomattandyrylǵan júıesine monıtorıng júrgizý kezinde aldyńǵy nómirdi jasyrý maqsatynda nómirdi aýdaryp otyratyn arnaıy mehanıkalyq jabdyq ornatqan buzýshy anyqtaldy. Beınekameralarǵa jaqyndaǵan kezde jol talǵamaıtyn kóliktiń júrgizýshisi kólik quralyn basqarý pýlti arqyly qurylǵyǵa sıgnal jiberip, memlekettik nómirdi jasyryp otyrǵan. Ol óz kóliginiń memlekettik nómirin jasyrý arqyly jol qozǵalysy erejelerin buzdy. Demek ol jol qozǵalysynyń basqa qatysýshylaryna qasaqana qaýip tóndirdi. Quqyq buzýshy ustalyp, ákimshilik zańnamaǵa sáıkes jaýapkershlikke tartyldy. Ol bir jyl merzimge kólik quralyn basqarý quqyǵynan aıyryldy, sondaı-aq oǵan 20 AEK kóleminde aıyppul tóleýge týra keledi», – dedi Almaty qalalyq PD Ákimshilik polıtsııa basqarmasynyń bastyǵy Jandos Muratalıev.
Onyń aıtýynsha, byltyr osyǵan uqsas quqyq buzýshylyqtar úshin 3192 júrgizýshi ákimshilik jaýapkershilikke tartyldy. Memlekettik tirkeý belgisin jasyrýǵa arnalǵan ártúrli qondyrǵylar men jalǵan nómirlerdi ornatý jol qozǵalysy erejelerin qasaqana buzý bolyp esepteledi.
«Júrgizýshilerge qala ishinde ornatylǵan kameralardyń barlyǵy durys jumys istep turǵanyn jáne túrli zań buzýshylyqtardy tirkeıtinin eskertken jón. Jol – qatelikterdi keshirmeıtinin árdaıym este ustaý kerek», – dedi Jandos Muratalıev.