Almatyda Jol kartasy aıasynda 214 ınfraqurylymdyq joba iske asady

ALMATY. QazAqparat – Almatyda «Jumyspen qamtý jol kartasy» aıasynda 214 ınfraqurylymdyq jobany iske asyrý josparlanyp otyr. Bul týraly qalalyq Ál-aýqat basqarmasy basshysynyń orynbasary Danııar Álkebaıuly onlaın-brıfıng barysynda aıtty, dep habarlaıdy QazAqparat tilshisi.

«Búgingi kúni konkýrstyq jumystar júrgizilip jatyr. Onyń ishinde áleýmettik-mádenı, turǵyn úı-kommýnaldyq sharýashylyq nysandaryn jáne ınjenerlik-kólik ınfraqurylymyn kúrdeli, ortasha jáne aǵymdaǵy jóndeý, qaıta jańartý jumystary bar. Eldi mekenderdi abattandyrý jobalary da nazardan tys qalmaıdy», – deıdi Danııar Álkebaıuly

Sonymen qatar, ol «Jumyspen qamtý jol kartasy» aıaqtalǵan soń jańadan salynǵan nysandarda 2 myńǵa jýyq turaqty jumys orny ashylatynyn jetkizdi.

«Jol kartasyn iske asyrý maqsatynda Almatyda 26 myńǵa jýyq jańa jumys orny paıda bolady. Ortasha jalaqy 120 myń teńge kóleminde taǵaıyndalady. Jumys oryndary ásirese qurylys salasy boıynsha usynylady» – dep atap ótti basqarma basshysynyń orynbasary.