Almatyda jol azabyn tartqan 11 myń turǵyny bar yqsham aýdannyń máselesi sheshildi

ALMATY. QazAqparat - Almatyda Hmelnıtskıı, Maılın kóshesinen «Jas qanat» yqsham aýdanyna deıin úńgileý jumystary aıaqtaldy. Baýyrjan Baıbek jumysshylarǵa «Jas qanat» yqsham aýdanyna deıin salynǵan jańa jol úshin alǵys aıtty, dep habarlaıdy QazAqparat tilshisi.

Almaty ákimi jumys sapary barysynda jedel damyp kele jatqan eldi mekendi qamtıtyn kólik ınfraqurylymyn qarap, kúrdeli ekonomıkalyq jaǵdaıda memlekettiń ınfraqurylymdy damytýǵa qarjy bólip otyrǵanyna erekshe nazar aýdartty.

Uzyndyǵy 1,1 shaqyrym bolatyn jańa jol salý 2016 jyldyń maýsymynda bastalǵan. Jumys barysynda 400-den astam jańa jumys orny quryldy, merdiger kompanııa qala bıýdjetine 400 mln teńge salyq tóledi, al eldi meken turǵyndary jańa jolǵa ıe boldy. 

«El prezıdenti aıtqandaı, qoǵamnyń qozǵaýshy kúshi - eńbek, sondyqtan «eńbek adamy» ataný - úlken qurmet. Sizderdiń arqalaryńyzda úı salynyp, jol jasaldy, óndiris órkendeý ústinde. Bul - qıyndyǵy men qaýpi mol jumys, biraq osy eńbek arqyly memleket damyp, órken jaıady», - dedi jumysshylarǵa alǵys bildirgen Baýyrjan Baıbek.

Jaqyn mańda ornalasqan mektep oqýshylary da Táýelsizdik kúni merekesi qarsańynda jaqsy syılyq jasaǵan eńbekshilerge alǵys aıtty. 

«Buryn biz aıaǵymyzǵa rezeńke etik kıip, batpaq pen shalshyq keship ótetin edik. Mektepke nemese emhanaǵa barý úshin aınalyp júretinbiz. Endi jol tóseldi, barlyǵyna alǵys», - dedi  balalar.

Aıta keteıik, Hmelnıtskıı kóshesin úńgileýdiń máni zor. Óıtkeni, jol azabyn tartqan «Jas qanat» yqsham aýdanynyń 11 myńǵa jýyq turǵyny endi erkin qatynaı alady. Yqsham aýdandaǵy eki kópir qurylysy aıaqtalyp, tórt jolaqty qozǵalys bóligi paıda boldy. Onyń eki jaǵyna aryq júıesi jasaldy, jaryq kózderi ornatyldy. Trotýarlar abattandyryldy, avtobýs qatynasy retteldi. Keler jyly «Jas qanat» yqsham aýdanynyń kósheleri jóndeledi.