Almatyda Joǵarǵy Sottyń elektrondy servısterin jyljytýǵa arnalǵan ilki joba iske qosyldy
Bul týraly QR Joǵarǵy sotynyń baspasóz qyzmeti habarlady.
Jobany Qazaqstan Respýblıkasynyń Joǵarǵy Soty men «Kazakhstan Bar Association» kommertsııalyq zańgerler alqasy» respýblıkalyq qoǵamdyq birlestigi birlesip uıymdastyrdy.
Іs-sharaǵa Joǵarǵy Sottyń janyndaǵy Sottardyń qyzmetin qamtamasyz etý departamentiniń basshysy Іlııas Ispanov, Almaty qalalyq sotynyń qylmystyq ister jónindegi apellıatsııalyq sot alqasynyń tóraǵasy Baqytjan Qaramanov, «Kazakhstan Bar Association» kommertsııalyq zańgerler alqasy» RQB múshesi Jangeldi Súleımanov, sot organdarynyń, qoǵamdyq birlestikterdiń, BAQ ókilderi men Almaty qalasyndaǵy joǵary oqý oryndary zań fakýltetiniń stýdentteri qatysty.
Іske qosylatyn joba qoǵamnyń aýqymdy bóliginiń sot tóreligine qoljetimdigin arttyrý, sottarda aqparattyq tehnologııalardy qoldaný aıasyn odan ári keńeıtý, sot óndirisin jeńildetý maqsatynda Joǵarǵy Sot qolǵa alǵan elektrondy sot isin júrgizýdi damytý baǵytyndaǵy kezekti qadam bolyp sanalady. Turǵyndardyń quqyqtyq mádenıeti men saýattylyǵyn arttyrýdy kózdeıtin joba «100 naqty qadam - barshaǵa arnalǵan zamanaýı memleket» Ulttyq Jobasyn iske asyrý aıasynda ózekti bolyp tabylady.
Kezdesýde sóz alǵan І. Ispanov: «Joǵarǵy Sot sot tóreliginiń túsinikti ári aıqyn bolýy úshin birqatar is-sharalardy júzege asyrýda. Bul jobany iske asyrý sotqa júgingen adamdarǵa Joǵarǵy Sottyń «Sot kabıneti», «Sot qujattarymen tanysý», «Habarlandyrýǵa qatysty sot qujattaryn qaraý» jáne basqa da elektrondy servısterdi paıdalaný boıynsha jyldam ári tegin keńes alýǵa múmkindik beredi», - dep atap ótti.
Óz kezeginde B. Qaramanov: «Sot qyzmetinde zamanaýı aqparattyq tehnologııalardy keńinen qoldaný jáne damytý - Joǵarǵy Sottyń basym baǵyttarynyń biri. Memleket basshysy Sýdıalardyń altynshy sezinde damytý qajettigine mán bergen elektrondy sot tóreligi tájirıbe kórsetkendeı, azamattardyń sot isin júrgizýge qoljetimdiligin aıtarlyqtaı jeńildetetindigi belgili», - dedi. Ol iske asyrylatyn joba bul jumysty aıtarlyqtaı jaqsartatyndyǵyna senim bildirdi.
І. Ispanov pen J. Súleımanov is-shara barysynda «Qazaqstan Respýblıkasy Joǵarǵy Sotynyń elektrondy servısterin jyljytý» ilki jobasyn iske asyrý týraly Erejege qol qoıdy.
Jobanyń nysany - 2015 jyldyń 1 shildesinen bastap alty aı boıy jetekshiler - «KazBar» RQB-nyń tájirıbeli zańgerleri jáne jobaǵa qatysý úshin iriktelgen zań fakýltetiniń stýdentteri aldyn ala arnaıy oqytýdan ótken soń, Joǵary Sottyń elektrondy servısteri boıynsha azamattar men zańdy tulǵalarǵa tegin keńes bere otyryp, tájirıbelik kómek kórsetedi. Keńester Almaty qalasynyń toǵyz sotynda arnaıy jabdyqtalǵan kabınetterde beriledi. Keleshekte mundaı kabınetter respýblıkamyzdyń basqa óńirlerindegi sottarda da ashylatyn bolady.
Arnaıy oqytýdan ótken jas mamandar Joǵarǵy Sottyń jáne «KazBar» uıymynyń tıisti sertıfıkatyn alady. Olar úshin jobaǵa qatysý - keleshekte sot organdarynda jáne «KazBar» uıymynyń qurylymdarynda jumysqa ornalasýǵa múmkindik beretin bastapqy qadam bolyp tabylady.