Almatyda jerdi zańsyz ıemdengen myńǵa jýyq tulǵaǵa aıyppul salyndy

ALMATY. QazAqparat - Almaty qalasynyń qurylysyn baqylaý basqarmasy basshysynyń orynbasary Oljas Tólebaev onlaın brıfıng barysynda jerdi zańsyz basyp alǵany úshin 950 tulǵaǵa 213,5 mln teńge aıyppul salynǵanyn jetkizdi, dep habarlaıdy QazAqparat tilshisi.

Onyń aıtýynsha, basty buzýshylyqtardyń biri – jer ýchaskelerin ózdigimen basyp alý, jaldaý merzimi ótken ýchaskelerdi jáne maqsatsyz jer ýchaskelerin paıdalaný.

«Negizinen, jeke turǵyn úı qurylysyna arnalǵan maqsatty ýchaskeler kommertsııalyq maqsattar men kásipkerlik qyzmet úshin paıdalanylady. Osyǵan baılanysty biz 862 tulǵaǵa qatysty 27,4 mln teńge somasyna aıyppul túrinde ákimshilik sharalar qoldandyq, kemshilikterdi joıýdy eskerttik», - dedi spıker.

Jerdi zańsyz ıemdenip alǵany úshin 950 adam jaýapqa tartylyp, olarǵa jalpy somasy 216,5 mln teńge aıyppul salyndy. Bul rette memlekettik qor jerleri esebinen jer ýchaskesiniń kólemin ulǵaıtý oryn alyp otyr. Mundaı buzýshylyqtar kóbinese jeke aýlalardy bólý, qorshaýlar ornatý, qoımalar túrinde qosymsha qurylystar júrgizý kezinde anyqtalady.

Qala qurylysyn baqylaý basqarmasynyń mamandary memlekettik qordan jerdi jalǵa alý merzimi ótip ketken 1114 ýchaskeni anyqtady. Mundaı jaǵdaılarda jergilikti atqarýshy organdarǵa tıisti ótinish berý arqyly jalǵa alýdy uzartýǵa bolady.