Almatyda jer ýchaskesin jaldaý merzimin uzartý kezinde kásipkerlerge qysym jasalǵan
21:25, 16 Aqpan 2023
ALMATY. QazAqparat - Almaty qalasynyń Sybaılas jemqorlyqqa qarsy kúres qyzmeti jer ýchaskesin jaldaý merzimin uzartý kezinde ákimshilik kedergiler men bıznes-sýbektilerdiń quqyqtaryna qysym jasaý faktilerin anyqtady, dep habarlaıdy QazAqparat tilshisi.
Vedomstvodan habarlaǵandaı, jer komıssııasy óziniń mindetine kirmeıtin jer ýchaskesin jańa merzimge jaldaý shartyn jasasýǵa ótinimderdi qarastyrǵan. Osyǵan baılanysty departament ýákiletti organǵa bul tájirıbeni toqtatýdy jáne ótinishterdi keri qaıtaryp alýdy usyndy.
«Búgingi tańda jer komıssııasynyń qaraýyndaǵy jeke kásipkerler men zańdy tulǵalardyń ótinishteri keri qaıtaryldy. Sondaı-aq, Jer kodeksiniń 37-baby tártibinde olarǵa jer ýchaskelerine ýaqytsha óteýli jer paıdalaný quqyqtary jańa merzimge berildi. Osylaısha departamenttiń aralasýynan soń ákimshilik kedergiler alynyp, kásipkerlerdiń quqyqtary qorǵaldy»,- dep jazdy Almaty qalasynyń Sybaılas jemqorlyqqa qarsy kúres qyzmetiniń baspasóz qyzmetinen.