Almatyda jer silkinisine osal ǵımarattar kartasy jasalady

ALMATY. QazAqparat – Almaty bıligi kópqabatty úılerdi tekserip shyqty. Tekserý nátıjesinde jer silkinisine osal ǵımarattar kartasy jasalatyn boldy, dep habarlaıdy QazAqparat tilshisi.

«Keler jyly jer silkinisine osal ǵımarattar kartasy jasalady. Bul kartada qandaı ǵımarattarda qaýip-qater bar ekeni kórsetiledi. Biz 2001 jyldan beri salynǵan ǵımarattardy pasportızatsııadan ótkizdik. Oǵan eki jyl ýaqyt ketti. Onyń aldynda salynǵan ǵımarattardy teksermedik. Sebebi, tekserýdiń qajettiligi joq», - dedi brıfıng barysynda qalalyq Josparlaý jáne ýrbanıstıka basqarmasynyń basshysy Almashan Ahmedjanov.

Onyń aıtýynsha, eski ǵımarattar qaladaǵy barlyq ǵımarat qorynyń 85%-yn alyp otyr.

«Bizde Keńes odaǵy kezinde 1969-1970 jyldary turǵyzylǵan úıler óte kóp. Bul úılerdiń barlyǵy jer silkinisine tózimdi ekenin moıyndaý kerek. Biraq keıbir ǵımarattar qazirgi normatıvterge saı emestigi dáleldendi. Olar mindetti túrde qaıta jóndeýden ótkiziledi», - dedi ol.

Basqarma basshysy ǵımarattar týraly málimet 2020 jyly jarııalanatynyn aıtty.

«Adamdar qandaı úıde turyp jatqanyn túsinýi kerek. Kóptegen turǵyndar úıiniń ishin óz qalaýynsha ózgertken. Keıbireýler negizgi tireý qabyrǵany alyp tastaǵan. Bul óte qaýipti. Muny eshkim teksermeı kelgen. 2 jylda biz ǵımarattardyń barlyǵynyń pasporttyq málimetin jasadyq», - dedi Almashan Ahmedjanov.