Almatyda Jeńis kúnine oraı 40-tan astam is-shara uıymdastyrylady

ALMATY. QazAqparat - Bıyl Almatyda Jeńis kúni joǵary deńgeıde uıymdastyrylady. Soǵysqa qatysqandar men tyl eńbekkerlerine jergilikti bılikten de, ardagerler keńesinen de barynsha kóńil bólinedi. Bul týraly qalalyq ardagerler keńesiniń tóraǵasy Ahan Bıjanov brıfıng barysynda aıtty, dep habarlaıdy QazAqparat tilshisi.

Almatyda Jeńis kúnine oraı 40-tan astam is-shara uıymdastyrylady. «Soǵys batyrlary beınelengen 40 bılbord ornatyldy. 9 mamyr taqyrybynda qalanyń barlyq medıabordtarynda jáne metro stantsııalarynda rolıkter ornalastyryldy. 20 myń «Jeńis lentasy» daıyndalyp, qala turǵyndaryna taratylady», - dedi Ahan Bıjanov.

Lentany saýda-oıyn-saýyq ortalyqtaryna, saıabaq aımaqtaryna, 28 gvardııashyl-panfılovshylar atyndaǵy saıabaqqa, Ortalyq mádenıet jáne demalys saıabaǵyna barǵan kezde alýǵa bolady.

Aıta keterligi, merekelik bezendirýden basqa aýdandyq ákimdikter ardagerler men barlyq jergilikti turǵyndar úshin kontsertter ótkizedi.

«Negizgi baǵdarlama 9 mamyrda saǵat 9:30-da bastalady. Bıyl «Batyrlarǵa taǵzym» aktsııasy uıymdastyrylady, onyń aıasynda qala turǵyndary M. Gorkıı atyndaǵy Almaty qalasynyń Ortalyq demalys saıabaǵynan Gogol kóshesindegi 28 gvardııashyl-panfılovshylar atyndaǵy saıabaqqa deıin soǵysta qaza tapqan batyrlardy eske alýǵa gúl shoqtaryn qoıý úshin ótedi», - dedi ol.

Gúl shoqtaryn qoıǵan soń qazaq estrada juldyzdarynyń qatysýymen kontsert bolady. Shara barysynda soǵys ardagerleri men tyl eńbekkerlerine merekelik dastarhan jaıylady.

«Sonymen qatar, mereke ótetin jerde áskerı shatyrlar men zamanaýı qazaqstandyq áskerı tehnıka, qarý-jaraq qoıylady. Merekelik sharalar aýdan ákimdikteri janyndaǵy alańdarda da, saıabaqtarda da, tipti turǵyn úılerdiń aýlalarynda da kúni boıy ótedi», - dedi Ahan Bıjanov.

Buǵan deıin habarlaǵanymyzdaı, Jeńis kúnine oraı 5 mlrd 400 mln teńgege birjolǵy áleýmettik kómek beriledi.