Almatyda jedel járdemniń 415 qyzmetkerine ústemeaqy beriledi

ALMATY. QazAqparat – Almatyda jedel járdem qyzmetiniń 415 qyzmetkeri jalaqysyna qosymsha ústemeaqy alatyn boldy. Bul týraly qalalyq jedel medıtsınalyq járdem qyzmetiniń bas dárigeri Birjan Ospanov onlaın brıfıng barysynda málimdedi, dep habarlaıdy QazAqparat tilshisi.

Onyń aıtýynsha, qyzmetkerlerdiń jalaqysy buǵan deıin qońyraý sanyna qaraı esepteletin.

«Sońǵy 3 jylda bizge 1 mln-ǵa jýyq qońyraý túsken. Ár ekinshi turǵyn jedel járdem qyzmetine júgingen. Onyń 955 myńy bıyl túsken. Qazir bizde eńbekaqysy jan basyna shaqqandaǵy qarjylandyrý júıesimen esepteledi. Ol bir adamǵa 163000 teńge shamasynda. Kelesi jyly eńbekaqysy 30%-ǵa ósedi»,- dedi Birjan Ospanov.

QR Densaýlyq saqtaý mınıstriniń buıryǵymen jedel járdem qyzmetkerlerine koronavırýs juqtyrý qaýpine baılanysty 1-2 dárejeli qosymsha tólemaqy qarastyrylǵan.

«2- dárejeli tólemaqyny dáriger men feldsher alady. Olar jalaqysyna qosymsha 425 000 teńge alady. Sondaı-aq, barlyq júrgizýshi 3-dárejeli tólemaqy 212 myń teńge alady. Bul buıryqqa 415 qyzmetker enbeı qaldy. Olar - sanıtar qyzmetkerler men dıspetcherler. Biz bul máseleniń de sheshimin taptyq. Jergilikti bıýdjetten osy maqsatta qazan, qarasha, jeltoqsan aılaryna qosymsha 212 000 teńgeden tóleý qarastyrylǵan», - dedi spıker.