Almatyda jat dinniń jeteginde ketkender raıynan qaıtýda
Almaty qalasy qoǵamdyq damý basqarmasyna qarasty keńes berý jáne ońaltý ortalyǵy jat dinniń jeteginde ketkendermen jumys isteıdi. Josparǵa sáıkes, ortalyq qyzmetkerleri bıyl 1000 adammen ońaltý jumystaryn júrgizýdi kózdegen. Mamandar ortalyq kómegine júgingen árbir adamen jeke-jeke sóılesedi. Megopolıstegi dinı ahýaldy atalǵan ońaltý ortalyǵynyń dırektory aıtyp berdi.
«Ońaltý ortalyǵyna kúnine naqty osynsha adam keledi dep aıta almaımyn. Sebebi, bir kúnde bir adam nemese on adam kelýi múmkin. Olardy kóbine dostary nemese ata-analary, týystary ákeledi»,- deıdi Almaty qalalyq keńes berý jáne ońaltý ortalyǵynyń dırektory Rýslan Qaıyrgeldi.
Bizdiń qoǵamda aqıda degen bar. Dástúrli Hanafı mázhaby men teris aǵymdaǵylardyń fıkhy men aqıdasy eki túrli. Mysaly, namaz oqý tásilderi ártúrli bolady. Eń basty qıyndyqtar osy tusta týyndaıtyn kórinedi. Mamandar mundaı adamdarmen jumys istegende arnaıy tásildi qoldanady.
«Negizi biz qandaı ádis qoldanatynymyzdy kópshilikke ashyp aıtpaımyz, ózimizdiń ádisimiz bar. Kóp jaǵdaıda suhbat túrinde júredi. Onyń ustanǵan ıdeologııasyn anyqtaımyz, ony aqıda dep ataıdy. Ońaltý tanysýdan bastalady. Oıy men kózqarasyna mán beremiz. Eń aldymen dıagnoz qoıamyz. Kimdi tyńdaıdy, qandaı ıdeologııany ustanady - sony anyqtaý kerek. Sodan keıin emdeýge kirisemiz»,-deıdi Rýslan Qaıyrgeldi.
Otandastarmyz qaqtyǵys aımaqtaryna ádildik izdep baryp, sońynda opyq jep qaıtady. Olar shynaıy din sol elderde dep oılaıdy.
«Qaqtyǵys aımaǵynan kelgenderdiń barlyǵynyń kózqarasyn ózgerttik dep aıta almaımyz. Alaıda ókinetinder bar. Sebebi, olar ol jaqqa ádildik izdep barady. Shynaıy dindi izdep barady. Qoǵamnan sharshadyq dep jatady. Sebepteri kóp. Sırııada shynaıy sharıǵat bar, zań bar dep oılaıdy. Keıin kóńili qalyp ta jatady. Bir mysal keltireıin. Sırııaǵa ketip qalǵan bir otbasynyń velosıpedin kórshileri urlap ketedi. Olar baryp, onyń ústinen polıtsııaǵa shaǵym túsirgen. Alaıda, uryǵa eshqandaı shara qoldanbaǵan. Bul oqıǵany sol elden oralǵan bir qaryndasymyz aıtyp berdi. Demek, dindi myqty ustanǵan el olardyń senimin aqtamaǵan»,-dep qosty dırektor.
Almatyda dindarlar kóp. Kim qandaı joldy tańdady - ony anyqtaý ońaı emes. Desek te, ońaltý ortalyǵy teris aǵym ókilderin raıynan qaıtarýǵa baryn salady.
«Shyn máninde raıynan qaıtarý ońaı sharýa emes. Ol qasyndaǵy adamdarǵa, qorshaǵan ortasyna baılanysty, jumys istep jatqan jeriniń de yqpaly bolady. Ońaltýdan ótkennen keıin olar túgeldeı jumys ornyn aýystyrýy qajet. Tipti, burynǵy dostarymen de baılanysty úzgeni abzal. Sonda ǵana ol adam jat aǵymǵa qaıtyp barmaıdy»,-deıdi ońaltý ortalyǵynyń dırektory
Sırııaǵa baratyndardyń basym bóligi - jas jigitter. Bul adamdar Mathalıdi qoldaıdy. Olar saıası bılik úshin ashyq kúrespegenimen, qoǵamdaǵy keıbir qundylyqtardy shırk, haram dep tanıdy.
«Qaqtyǵys aımaǵyna ketetinder - radıkaldar. Bizde Qazaqstanda mathalıler bar. Olar - Mathalı degen kisiniń sońynan erýshiler. Bizdiń dinı basqarmanyń pátýasyna saı emes. Ondaı kisilermen psıholog, teologtar jumys isteıdi»,-deıdi Rýslan Qaıyrgeldi.
Foto: islam.kz