Almatyda jastarǵa dinı ekstremızm týdyratyn qaýip-qater túsindirildi

ALMATY. QazAqparat – Almatyda polıtehnıkalyq kolledj stýdentteriniń dinı ekstremızm men terrorızm taqyrybyndaǵy saýatyn ashýǵa baǵyttalǵan jıyn ótti, dep habarlaıdy QazAqparat tilshisi.

Mundaı túsindirý jumystaryn Qoǵamdyq damý basqarmasynyń tapsyrys aıasynda «Qazaqstan Respýblıkasyndaǵy lańkestik jáne ekstremızm máselelerin zertteý ortalyǵy» qoǵamdyq qory uıymdastyryp otyr.

Sarapshy mamandar stýdentterge dinı qatynastar jáne dinı ekstremızm men terrorızmge qarsy turý salasyndaǵy zańnamalyq normalar týraly túsindirdi.

Sharaǵa jınalǵan stýdentter Din jáne mádenıet isteri boıynsha ál-Farabı atyndaǵy QazUÝ-dyń professory Kákimjan Bıshmanovtan dinı saýattylyǵyn arttyryp, zań turǵysynda mindetteri men quqyqtaryn naqtylady.

«Terrorızm, ekstremızm, varvarızm jaıly estigen bolarsyzdar. Terrorıstiń dini, ulty joq. Terrorıst ómirin ózin-ózi óltirýmen aıaqtaıdy. Terrorıstiń óz-ózine qol jumsaýy men qarapaıym adamnyń ózin óltirýi eki túrli jaǵdaı. Degenmen, eki jaǵdaıda da adam ózin óltiredi. Qaı dinde de ózine qol salý aýyr kúná bolyp esepteledi. Ózin óltirgenmen qoımaı, terrorıster jazyqsyz adamnyń da ómirine balta shabady. Bir adamdy jazyqsyz óltirgen búkil adamzatty óltirýmen teń», - deıdi Kákimjan Bıshmanov.

Professor stýdentterge Qazaqstanda resmı túrde tirkelgen 17 iri din konfessııasy aıasynda áńgime qozǵap, din men bıliktiń bir-biriniń isine ne sebepti aralaspaıtynyn túsindirdi.

«Bizdiń búkil ómirimiz zańmen tyǵyz baılanysty. Radıkalızm dep atalatyn jol boıynsha júretin bolsaq, bul qoǵamdyq pikirge qosylmaıtyn kózqaras ekenin túsinemiz. Olar zańǵa baǵynbaıdy. Radıkalızm - kabel sııaqty. Onyń baǵyttarynyń biri – ekstremızm. Ol tártipsizdikke, shabýylǵa shaqyryp, memleket ishinde haýs jasaýdy maqsat tutady. Ekstremızmniń ózi dinı, saıası, ulttyq bolyp bólinedi. Osy qasıettiń barlyǵy bir adamnyń boıynda bolady. Óıtkeni ekstremızmniń qaı túri bosa da bir-birimen baılanysty. Bul júretin bomba», - dedi professor.

Almaty memlekettik polıtehnıkalyq kolledji stýdentteri men profesordyń arasynda áńgime órbip, jastar mamanǵa kókeıinde júrgen suraqtaryn qoıdy.

Aıta ketý kerek, mundaı kezdesýler qalalyq Qoǵamdyq damý basqarmasynyń Qazaqstan Respýblıkasynda dinı ekstremızm men terrorızmge qarsy is-qımyl jónindegi 2018 – 2022 jyldarǵa arnalǵan memlekettik baǵdarlama aıasynda atqarylyp otyr.