Almatyda jastardyń ǵylymı pikirtalasy ótedi

ASTANA. QazAqparat - 27-28 aqpan kúnderi Qazaq ulttyq qyzdar pedagogıkalyq ýnıversıtetinde «Zamanaýı jastardyń ǵylymı pikirtalasy: ózekti máseleleri, jetistikteri jáne ınnovatsııalary» atty respýblıkalyq ǵylymı-tájirıbelik konferentsııa ótedi. Bul týraly oqý ornynyń baspasóz qyzmetiniń jetekshisi Jandar Asan aıtty, dep habarlaıdy QazAqparat.

Basqosý Jastar jyly qarsańynda uıymdastyrylyp otyr. Joǵary oqý oryndarynyń stýdentteri, magıstranttary men doktoranttary qatysatyn jıynda oqý orny elimizdegi jas ǵalymdardyń shyǵarmashylyq qabiletin shyńdaýdy kózdeıdi.

Konferentsııanyń basty maqsaty - jas ǵalymdardyń jasampazdyq áleýetin damytý, olardy zamanaýı ǵylymnyń mańyzdy máselelerin sheshýge belsendi túrde tartý, ǵylymı bilim berý keńistigin damytý. Sonymen qatar izdenýshilerdiń ózara baılanys ornatýlaryna, tájirıbe almasýlaryna yqpal jasaý.

«Jastardyń shyǵarmashylyq, ǵylymı-zertteý jumystaryn nasıhattaý men ony keń kólemde jarııalaýda, olardyń tulǵalyq damýdyń tásili retindegi jobalyq zertteý is-áreketterine tartýda jáne bilim berý úrdisiniń tıimdiligin kóterý men qoldanbaly ǵylymǵa degen qyzyǵýshylyqtaryn damytýda osy taqilettes jıyndardyń mańyzy zor», - dep atap ótti Jandar Asan.

Bıylǵy konferentsııa «HHІ ǵasyrdaǵy jaratylystaný ǵylymdarynyń teorııalyq baǵyttary», «Hımııa ǵylymdarynyń zertteýleriniń ózektiligi, jetistikteri men ınnovatsııasy», «Jaratylystaný ǵylymdarynyń damý zańdylyqtary men ınnovatsııasy» jáne «Zamanaýı bilim berý keńistigindegi oqytý men tárbıeniń teorııasy jáne ádisteri» sektsııalary boıynsha ótkizilmek.