Almatyda jastardy jumysqa ornalastyrýǵa baǵyttalǵan «Mansap kúnderi» bastaldy

ALMATY. QazAqparat - Búgin Almatyda Arbat alańy men Panfılov kóshesinde joǵary oqý oryndary men kolledj túlekterin, jumyssyz jastardy jumysqa ornalastyrýǵa baǵyttalǵan «Mansap kúnderi» bastaldy, dep habarlaıdy QazAqparat tilshisi.

«Mansap kúnderi» qalanyń ár aýdanynda 8 kún boıy ótedi. «Jumyspen qamtý jáne NEET sanatyndaǵy jastardyń úlesin azaıtý Almaty qalasyn 2025 jylǵa deıin damytý baǵdarlamasynyń negizgi mindetteriniń biri bolyp tabylady. «Mansap kúni» Almaly aýdanynyń jastary úshin kóptegen múmkindikter beredi. Sonymen qatar, jastarǵa keńes berý úshin úzdik spıkerler men kásiptik baǵdar berý mamandary shaqyryldy. Búgingi «Mansap kúnine» qatysa almaǵandar úshin Jastar saıasaty basqarmasy men Tsıfrlandyrý basqarmasy birlesip, «Jobfair 365» tsıfrlyq bos oryndar jármeńkesin ázirledi. Kelesi bos jumys oryndar jármeńkesi 9 maýsym kúni Medeý aýdanynda Ortalyq mádenıet jáne demalys saıabaǵynda ótedi», - dedi sharanyń ashylý saltanatynda qalalyq jastar saıasaty basqarmasynyń basshysy Qaıyrjan Meńdiǵalıev.

«Mansap kúnderi» sharasyna iri kompanııalardyń 100-den astam jumys berýshileri qatysyp, jastarǵa bos jumys oryndaryn usyndy. Sondaı-aq, 26 ýnıversıtet, 21 kolledj ókilderi men 5 myńnan astam jastar qatysty.

«Almaly aýdany – qalanyń iskerlik jáne ákimshilik ortalyǵy. Munda iri kompanııalardyń shtab-páteri jáne ártúrli saladaǵy kompanııalar ornalasqan. Ótken jyly biz 4 myńnan astam jańa jumys ornyn ashtyq. Bıyl 9 myńnan astam jumys orny ashylady dep kútiledi. Mundaı sharalardy ótkizý – jastardy qoldaý jáne NEET sanatynyń úlesin azaıtýdaǵy mańyzdy qadam bolyp tabylady», - dedi Almaly aýdanynyń ákimi Aıdar Jákibaev.

Almaty qalalyq jastar saıasaty basqarmasynyń málimetinshe, Almatyda 682 myń jas bolsa, onyń 82 myńnan astamy Almaly aýdanynda turady.

«Búginde qaladaǵy JOO men kolledjderde 255 myńnan astam stýdent bilim alýda. Almaty qalasyn damytýdyń 2025 jylǵa deıingi baǵdarlamasynyń basym mindetiniń biri NEET (NEET – Not in Education, Employment or Training) sanattaǵy jastar úlesin azaıtý bolyp tabylady. Búgingi tańda jastardyń jalpy sanyndaǵy NEET jastarynyń úlesi 8,3% quraıdy (53 myńnan astam jas)», - delinedi qalalyq jastar saıasaty basqarmasynyń habarlamasynda.

Aıta keteıik, is-sharany Almaty qalasynyń jastar saıasaty basqarmasy uıymdastyrdy.