Almatyda jastardy ásker qataryna esepke qoıý jumystary júrgizilip jatyr

ALMATY. QazAqparat – Almatyda 17 jasqa tolǵan jastardy áskerge shaqyrtý ýchaskesine tirkeý jumystary júrgizilip jatyr. Bul týraly Almaty qalasy Qorǵanys isteri jónindegi departament basshysynyń orynbasary Farhat Qurmanǵajınov onlaın brıfıng barysynda aıtty, dep habarlaıdy QazAqparat tilshisi.

Azamattardy shaqyrý ýchaskelerine tirkeý jas adamdardy áskerı esepke turǵyzý, olardyń sanyn, áskerı qyzmetke jaramdylyq dárejesin aıqyndaý, bilim deńgeıin, alǵan mamandyǵy men dene daıarlyǵyn anyqtaý maqsatynda qańtar aıynyń basynan bastap júrgizilýde. Іs-shara jyl saıyn 5 qańtardan 31 naýryzǵa deıin ótkiziledi.

Bıyl Almaty boıynsha 7 myńǵa jýyq jasóspirimdi áskerı esepke qoıý josparda. Árbir adam turǵylyqty jeri boıynsha jergilikti áskerı basqarý organyna júginip, tolyq aqparat ala alady.

Kún saıyn qalanyń jergilikti áskerı basqarý organdaryna medıtsınalyq tekserýden ótý úshin mektep jáne arnaıy orta oqý oryndarynyń oqýshylary kelip jatyr. Jasóspirimder áskerı qyzmetke jaramdylyǵyn dáleldeıtin medıtsınalyq tekserýden ótedi. Eger tirkeý barysynda emdelýge nemese medıtsınalyq baqylaýǵa muqtaj áskerge shaqyrý jasyna deıingiler anyqtalsa, onda olar emdeý-profılaktıkalyq uıymdaryna tirkeledi.

Belgili bir jumys algorıtmi jasaldy. Atalǵan jumys barlyq sanıtarlyq talaptardy saqtaı otyryp uıymdastyryldy, sanıtarlyq-epıdemıologııalyq sharalar kúsheıtildi.

«Qala aýdandarynyń basqarmalarynda áskerge shaqyrý jasyna deıingiler men medıtsınalyq komıssııa músheleri medıtsınalyq betperdelermen jáne antıseptıktermen qamtamasyz etiledi. Medıtsınalyq tekserý keminde 2 metr qashyqtyqty saqtaý arqyly ótedi. Medıtsınalyq komıssııa ǵımaratynda kúnine keminde 2 ret barlyq qyzmettik jáne qosalqy bólmelerge dezınfektsııa júrgiziledi», - dep atap ótti Farhat Qurmanǵajınov.

Azamattardy shaqyrý ýchaskelerine esepke alý jumystary jergilikti atqarýshy organdary jergilikti áskerı basqarý organdarymen birlesip júrgizedi.

Qazaqstan Respýblıkasynyń «Áskerı qyzmet jáne áskerı qyzmetshilerdiń mártebesi týraly» Zańyna sáıkes esepke turǵan jyly jasy 17-ge tolǵan nemese sol jyly tolatyn Qazaqstan Respýblıkasynyń er azamattary jatady.

Barlyq is-sharalar aıaqtalǵannan keıin jastarǵa shaqyrý ýchaskesine tirkeý týraly kýálik beriledi. Bul kýálik áskerge shaqyrý kezinde shaqyrylýshynyń esepte turǵanyn rastaıtyn qujat.

Áskerı esepke alǵash turǵan azamattarmen qosymsha Qorǵanys mınıstrliginiń áskerı oqý oryndaryna túsý boıynsha aqparattyq jumys júrgiziledi jáne kelisimshart boıynsha áskerı qyzmettiń artyqshylyqtary túsindiriledi.

Medıtsınalyq (áskerı-dárigerlik) komıssııa áskerı esepten shyǵara otyryp, áskerı qyzmetke jaramsyz dep tanyǵan azamattar áskerı esepke qabyldanbaıdy. Azamattar jumys (oqý) ornyn, atqaratyn laýazymyn jáne ortasha jalaqysyn saqtaı otyryp, áskerge shaqyrylýǵa deıingilerdi áskerı esepke qoıýǵa baılanysty mindetterdi oryndaý úshin qajetti ýaqytqa jumystan (oqýdan) bosatylady.