Almatyda jastar arasynda «Táýelsizdik urpaqtary» baıqaýy bastaldy

ALMATY. QazAqparat – Almatyda 14-35 jas arasyndaǵy jastarǵa arnalǵan «Táýelsizdik urpaqtary» baıqaýy bastaldy. Bul týraly óńirlik kommýnıkatsııalar qyzmeti brıfınginde «Táýelsizdik urpaqtary» grantyn taǵaıyndaý is-sharasyn uıymdastyrý jónindegi joba jetekshisi Shyryn Tilenshıeva aıtty, dep habarlaıdy QazAqparat tilshisi.

Spıkerdiń sózinshe, bıyldan bastap granttar alǵash ret óńirlik deńgeıde beriletin bolady. Baıqaýǵa ótinimder 15 tamyz - 10 qazan aralyǵynda qabyldanady.

«Qazirgi ýaqytta Almaty qalasynyń jastar saıasaty basqarmasynyń qoldaýymen «Almaty Stýdentter Alıansy» korporatıvtik qory qala jastaryna arnalǵan «Táýelsizdik urpaqtary» granttaryn berýge konkýrs jarııalady. Atap aıtqanda, joba Almaty qalasynyń turaqty turǵyny, 14 pen 35 jas aralyǵyndaǵy jastar bastamalaryn iske asyrýǵa baǵyttalǵan», - dedi Shyryn Tilenshıeva.

Granttar jańa ıdeıalar men bastamalardy iske asyrý úshin konkýrstyq negizde kelesi baǵyttar boıynsha beriledi:

1. «Ǵylym» – ǵylymnyń basym sektorlarynda jańa ǵylymı jobalar men zertteýlerdi iske asyrý úshin;

2. «Mádenıet» – Qazaqstannyń mádenı murasyn tanymal etýge, halyqtyq mádenı dástúrler men ónerdi ilgeriletýge baǵyttalǵan jobalardy iske asyrý úshin;

3. «Aqparattyq tehnologııalar» – jańa IT-sheshimder men jobalardy, onyń ishinde startap-jobalardy iske asyrý jáne ázirleý úshin;

4. «Bıznes» – ekonomıkanyń basym sektorlarynda jańa bıznes-ıdeıalardy iske asyrý úshin;

5. «Medıa» – jańa medıa-jobalardy, onyń ishinde jastar úshin tanymdyq, paıdaly, qyzyqty kontent qurý jónindegi jobalardy iske asyrý úshin.

«Granttyń mólsheri men sany ár baǵyt boıynsha anyqtalady. Bir granttyń mólsheri – 1 mln teńge. «Ǵylym», «Aqparattyq tehnologııalar» jáne «Bıznes» baǵyttary boıynsha 3 jeńimpazdan, al «Mádenıet», «Medıa» baǵyttary boıynsha 2 jeńimpaz anyqtalady. Jalpy konkýrs aıasynda 13 úmitkerdiń jeńimpaz atanýǵa múmkindigi bar», - dedi spıker.

Konkýrs eki kezeńde ótkiziledi:

I kezeń – ýákiletti organnyń konkýrstyq ótinimderdi qabyldaýy jáne talaptarǵa sáıkestigin qaraý;

II kezeń – konkýrstyq ótinimderdi baǵalaý jáne konkýrs jeńimpazdaryn anyqtaý.

«Grant berýdiń maqsaty – belsendi shyǵarmashyl jastar qaýymdastyǵyn qalyptastyrýǵa baǵyttalǵan jańa jáne qoldanystaǵy jastar bastamalaryn memlekettik qoldaý. Konkýrstyq komıssııanyń quramyna ortalyq atqarýshy organdar men azamattyq qoǵam ókilderi, ǵalymdar jáne grant baǵyttary boıynsha mamandar men sarapshylar engiziledi. Konkýrstyq komıssııanyń otyrystary ashyqtyq, aıqyndyq qaǵıdattarynda, ınternet-resýrstar men áleýmettik jelilerdegi resmı akkaýnttarynda onlaın translıatsııa rejıminde ótkiziledi», - dedi Shyryn Tilenshıeva.

Joba boıynsha tolyq aqparat pen týyndaǵan suraqtarǵa jaýapty «Almaty stýdentter alıansynyń» @qsa_almaty áleýmettik jelisinen alýǵa bolady.