Almatyda jasampaz jastardyń jańa kovorkıng-ortalyǵy ashyldy
Jańa ortalyq Open Space qaǵıdasy boıynsha jabdyqtalǵan, birneshe bólimnen turady. Munda IT station, 1000 kitap qory bar Reading platform kitaphanasy, semınar, trenıngter ótkizetin Meeting room bar. Bul ortalyqtyń ashylýyna almatylyq metsenattar Ámirjan Nábıev, Vıacheslav Banşıkov pen Qaıyrjan Mımıkenov uıytqy boldy.
Búgin jańa kovorkıng-ortalyqta birinshi mańyzdy shara ótti. Jasampaz jastardyń basyn biriktiretin ortalyqta «Nur Otan» partııasynyń Almaty qalalyq fılıalynyń tóraǵasy Baýyrjan Baıbek qaýymdastyqtyń jańa múshelerine partııa bıletterin tabys etti.
Olardyń arasynda qazaq tili klýbynyń jetekshisi Marına Faleeva, Qazaqstan paraolımpıada oıyndarynyń birneshe dúrkin chempıony Azamat Orazbek, jas kompozıtor Ǵalamat Beıseqoja, Sıngapýrde ótken «medıtsına salasy boıynsha 100 úzdik startap jobanyń» jeńimpazy Alına Achılova, «L-Generation» basshysy Edýard Lı, telejúrgizýshi Dıana Sqatova, «Arlan» teatrynyń akteri Shalqar Qudaıbergenov bar.
Almaty qalasynyń ákimi Baýyrjan Baıbektiń aıtýynsha, jastardy qoldaý, olarǵa jaǵdaı jasaý Prezıdent Qasym-Jomart Toqaevtyń jastardy qoldaý tapsyrmasynyń údesinen shyǵyp otyr.
Aıta ketý kerek, bul Almaty ákimdigi ashyp otyrǵan alǵashqy ortalyq emes. Buǵan deıin Alataý, Naýryzbaı aýdandarynda ashylǵan kovorıng-ortalyqtar jastardyń mádenı, áleýmettik, ekonomıkalyq, ıdeıalyq ortalyqtaryna aınalǵan. Qazir onda úzdiksiz master-klasstar, trenıngter, jastardy jumysqa ornalastyrý boıynsha keńester ótkizilip otyrady. Sondaı-aq, Jambyl atyndaǵy jasóspirimder kitaphanasy modernızatsııadan ótip, zamanaýı keıipke endi. Burynǵy Tramvaı turaǵynda jastarǵa arnalǵan Loft- ortalyq pen «Depo Evolution Park» ashý josparda bar.
Elbasynyń bes áleýmettik bastamasy boıynsha Almatyda 20 myń oryndy 38 jataqhana salý josparlanyp otyr. Búginde tórt jataqhana qoldanysqa berildi. Jaqynda taǵy beseýi ashylady. Qalalyq «Almaty jastary» baǵdarlamasy aıasynda sońǵy eki jylda 200 jas otbasy baspanaly boldy. Sondaı-aq, kásibı jáne tehnıkalyq bilimge de erekshe nazar aýdarylyp otyr. Qazirgi tańda 30 myńnan astam jas servıstik qyzmetti tegin úırenip aldy.