Almatyda jarylǵysh zat týraly jalǵan habarlama taratqan eki azamat anyqtaldy
Olardyń biri – 32 jastaǵy T. esimdi jergilikti turǵyn. Túngi saǵat 02:00 shamasynda ol qalanyń Túrksib aýdanyndaǵy kommertsııalyq nysandardyń birine jarylǵysh zat qoıylǵany týraly habarlady. Arnaıy qyzmettiń nysandy komıssııalyq tekserýi aqparattyń jalǵan ekenin anyqtady.
Habarlaǵan adamnyń kim ekeni birden belgili boldy. Ol ustaldy jáne óz kinásin moıyndady.
Kúdiktiniń aıtýynsha, ol buzaqylyq nıetpen jalǵan habarlama jasaǵan. QR QІJK-niń 128-babyna sáıkes, ol qamaýǵa alyndy. Oǵan QR QK-niń 273-babynda kózdelgen qylmys boıynsha aıyp taǵylyp otyr.
Taǵy bir kúdiktini polıtsııa qalanyń tómengi bóliginde ustady. Ótken kúni 28 jastaǵy T. esimdi azamat Bostandyq aýdanynda ornalasqan saýda jáne oıyn-saýyq ortalyqtarynyń birinde jarylǵysh zat bar ekeni týraly jalǵan habarlama bergen. Qaskóı «izin sýytpaı» ustaldy.
Tájirıbe kórsetkendeı, saýda úıleri, qoǵamdyq tamaqtaný oryndary jáne basqa da áleýmettik nysandar, adamdar kóp jınalatyn obektiler terrorızm aktileri týraly jalǵan habarlamalarǵa jıi ushyraıdy. Telefon buzaqylarynyń jiberetin eń úlken qatesi – taba almaıdy degen jalǵan senim. Biraq bul jerde olar qatelesedi: búginde polıtsııanyń da, basqa quqyq qorǵaý organdarynyń da telefon shalýshyny anyqtap, sáıkesinshe jaýapqa tartýǵa tehnıkalyq múmkindikteri jetkilikti.
Osyǵan baılanysty Almaty polıtsııasy jalǵan habarlamalar úshin qylmystyq jaýapkershilik bar ekendigin taǵy da eske salady. QR QK-niń 273-babynyń normasyna sáıkes, aldaǵy lańkestik aktisi týraly jalǵan aqparat berý alty jylǵa deıingi merzimge bas bostandyǵynan aıyrý jazasymen jazalanady.