Almatyda jaryq dıodty ónimder shyǵaratyn zaýyt iske qosyldy
Jańa óndiris ornynyń biregeıligi sol, mundaǵy LED-ónimder kompanııanyń ońtústikkoreıalyq seriktestigi - DS Multimedia kompanııasynyń zamanaýı tehnologııalary arqyly óndiriledi. Sondaı-aq, ónimderdiń sapasy kompanııanyń R&D-zerthanasy arqyly júzege asyrylady.
Búgin «Innovatsııalyq tehnologııalar parkine» arnaıy kelgen Almaty qalasy ákiminiń orynbasary Erlan Áýkenov jańa zaýyttyń tsehtaryn, óndiris jelilerin aralap kórip, alǵashqy shyǵarylyp jatqan ónimdermen tanysty.
«Biz búgin Almaty qalasyn ındýstrııalandyrý kartasynyń kezekti jobasyn iske qosyp jatyrmyz. Bizde jospar boıynsha 67 joba bar. Bıyl solardyń altaýyn iske qosqanbyz. Mine, búgin jetinshi jobany júzege asyryp otyrmyz. Bul, Alataý «Innovatsııalyq tehnologııalar parki» aımaǵynyń ekinshi kezegindegi alǵashqy nysan. Bul Qazaqstan men Ońtústik Koreıanyń birlesken kásiporny. Munda shyǵarylatyn ári úlken suranysqa ıe zamanaýı ónimder: LED-shamdar, LED-ekrandar jáne basqa da LED-jabdyqtardyń baǵasy sapasyna qaraı, sheteldik ónimderdiń baǵasynan 20 paıyzǵa deıin arzan. Óıtkeni, zaýyt arnaıy ekonomıkalyq aımaqta ornalasqan», - dedi E. Áýkenov.
Jańa zaýytta 50 jumys orny ashyldy. Aldaǵy ýaqytta, kásiporyn tolyq qýatyna engen soń, jumys oryndarynyń sany 150-ge jetkiziledi dep josparlanýda.
Jospar boıynsha, zaýytta jylyna 400 myń dana LED-shamdar, 25 myń dana LED-ekrandar jáne 38 myń dana LED-jabdyqtar shyǵarylatyn bolady.
Aıta ketelik, «DS Multimedia CA» - Ońtústik Koreıalyq «DS Multimedia» kompanııasynyń qazaqstandyq bólimshesi. Bul osymen álem boıynsha altynshy «DS Multimedia» zaýyty. Buǵan deıin osyndaı zaýyt Sıngapýrde, Malaızııada, Mysyrda, Brazılııada jáne Ońtústik Koreıada ashylǵan bolatyn.
Aıta ketelik, «DS Multimedia CA» kompanııasy óziniń «Tecata» brendimen shyǵarylatyn ónimderine Qazaqstan naryǵynda 3 jyldan 5 jylǵa deıin kepildik beredi.