Almatyda jappaı menıngıt taraǵany týraly aqparat jalǵan – ákimdik

ALMATY. QazAqparat – Almatylyqtar jappaı menıngıt juqtyryp jatyr degen aqparat shyndyqqa saı kelmeıdi. Bul týraly qalalyq qoǵamdyq densaýlyq saqtaý basqarmasy málimdedi, dep habarlaıdy QazAqparat tilshisi.

Áleýmettik jelide balabaqshalarda menıngıt juqpasy taraǵany týraly habarlama jarııalandy. Qalalyq qoǵamdyq densaýlyq saqtaý basqarmasy dabyl qaǵýǵa eshqandaı negiz joq ekenin aıtady.

Jyl basynan beri almatylyq emhanalarǵa 1470 adam menıngıt juqpasy degen kúdikpen qaraldy. Olardyń jartysynda dıagnoz rastalǵan joq. Bul juqpadan bıyl adam ólimi tirkelgen joq.

Basqarma basshysynyń mindetin atqarýshy Janar Madeevanyń aıtýynsha, balalar arasynda kóbinese entervırýstyq etıologııadan bastalǵan menıngıt juqpasy tirkelgen.

Mamandar osydan 2 jyl buryn Almatyda 4 adamnyń ómirin jalmaǵan menıngokokk juqpasy bıyl tirkelmegenin aıtty.

«Balalarda orta nemese jeńil deńgeıli aýrý bolǵan. Alaıda, balalardyń barlyǵy derlik tolyq jazylyp ketti. Menıngıt juqpasy boıynsha epıdemıologııalyq ahýal turaqty. Almatyda negizinen sirli menıngıt jıi kezdesedi. Bul juqpa adam ólimine ákelmeıdi. Onyń menıngokokktan qandaı ereksheligi bar? Sirli menıngıt kóbinese sýyqtaýdan, tumaý tıgennen keıin paıda bolady», - deıdi Janar Madeeva.

Almaty qalalyq balalarǵa arnalǵan juqpaly aýrýlar aýrýhanasynyń bas dárigeri Erjan Seralınniń aıtýynsha, bul dertti kez kelgen qozdyrǵysh – vırýs, bakterııa, zeń taǵy basqa patogender týǵyzýy múmkin.

«Kez kelgen menıngıt menıngokokk juqpasy bola bermeıdi. Menıngokokk juqpasynan bolǵan menıngıt tez asqynady. Birneshe saǵat ishinde adam ólip ketýi de múmkin. Eger der kezinde naýqasqa kómek kórsetilse, jazylyp ketedi. Іrińdi menıngıtten góri sirli menıgıt anaǵurlym jeńil ótedi. Biraq naýqastar mindetti túrde aýrýhanaǵa jatýy tıis. Aınalasy 10 kúnde naýqastar tolyq aıyǵyp ketedi», - dedi Erjan Seralın.

Aıta ketý kerek, 18 qazanda Qazaqstannyń bas sanıtar dárigeri Jandarbek Bekshın menıngıt juqpasy boıynsha epıdemıologııalyq ahýal týraly aıtqan bolatyn.

Onyń málimdeýinshe, qazir Qazaqstanda menıngokokk ınfektsııasyn juqtyrý boıynsha 50 jaǵdaı tirkeldi. Ótken jyly 83 edi. ıAǵnı, búgingi kúni menıngıt juqtyrý deńgeıi 47 paıyzǵa azaıdy

Byltyr respýblıka boıynsha menıngokokk juqpasynan 13 adam kóz jumǵan. Almatyda 5 adam kóz jumdy. Onyń ekeýi - 5 jasqa deıingi balalar. Eki balanyń anasy aýrýdyń alǵashqy belgileri bastalǵanda jekemenshik emhanadaǵy ózderiniń jeke dárigerlerinen keńes alǵany belgili boldy. Syrqattanǵandardyń biri - 27 jastaǵy órt sóndirýshi Oljas Súleımenovtyń aýrýy nebári 12 saǵattyń ishinde asqynyp, kenetten kóz jumǵan. Jalpy, Almaty oblysynda 4 adam kóz jumdy.