Almatyda Jandosov kóshesindegi BRT qurylysy qashan aıaqtalady
BRT jobasy aıasynda 8,7 shaqyrym joldyń 7,7 shaqyrymy qaıta jańartyldy. Birinshi kezeńniń marshrýt ýchaskesi Ǵ.Mustafın - Súleımenov - Jandosov – Tımırıazev kóshelerimen Jeltoqsan kóshesine deıin barady.
«Jandosov kóshesinde Súleımenov kóshesinen N.Tilendıev kóshesine deıin jumys jasalyp jatyr. Bıyl jer ýchaskelerin satyp alyndy jáne ǵımarattar buzyldy. Qurylysty 2021 jyldyń jeltoqsanynda aıaqtaý josparlanyp otyr», - dep habarlady basqarmadan.
Buǵan deıin, BRT qurylysynyń birinshi kezeńi qyrkúıek aıynda aıaqtalady dep málim etilgen.
BRT qurylysynyń ekinshi kezeńine keletin bolsaq, qazirgi ýaqytta Almatyda júrdek avtobýs jelisi qurylysyn joba–smeta qujattary ázirlenip jatyr. BRT jobasynyń ekinshi kezeńi, ıaǵnı 13 shaqyrymdyq ýchaskesi Jeltoqsan kóshesimen Tóle bı, Shyǵys aınalma joly, Halyk Arena tusyndaǵy depoǵa deıin barady.
«BRT qurylysy qarajat bólingen jaǵdaıda 2021 jyldan bastalady. Saraptama qorytyndysy shyqqan soń respýblıkalyq bıýdjetke saýal jiberýimiz múmkin. Keler jyly bastasaq, qurylys jumystaryna shamamen 22 aı ketedi. Qurylys jumystary 1,5-2 jylǵa sozylady», - dedi qalalyq Mobıldilik basqarmasy basshysynyń orynbasary Ernur Ábjahan. Joba quny shamamen 12 mlrd dollar dep baǵalanyp otyr.