Almatyda jańbyr sýy tolyp qalatyn 56 ýchaske anyqtaldy
Qalalyq jasyl ekonomıka basqarmasy basshysynyń mindetin atqarýshy Serik Ádilbaevtyń aıtýynsha, qalada nóser kezinde únemi sý basyp qalatyn 56 aımaq anyqtalǵan.
«Negizgi sebep – keıbir aýmaqtarda aryq jelileriniń joqtyǵy. Nemese jumys istep turǵan aryq jelileri men kollektorlardy ótkizý qabileti tómen. ıAǵnı, qoqys pen topyraqqa tolyp qalǵan», - dedi ol.
Spıkerdiń sózinshe, qala aýmaǵynda jańbyr jáne erigen qar sýlaryn burýǵa arnalǵan 16 kollektor bar. Onyń 12-si aryq jelilerine qosylmaǵan. Alataý aýdanynda 2013 jyldan 2018 jylǵa deıin salynǵan 4 kollektor ǵana aryq jelilerimen qosylǵan jáne jumys istep tur.
«Bıylǵy jyly jalpy uzyndyǵy 376 km bolatyn qalanyń aryq jelisin salý jáne modernızatsııalaý boıynsha joba ázirlendi. Jobada qoldanystaǵy aryq jelilerin rekonstrýktsııalaý, jańa aryqtardyń núkteli qurylysyn júrgizý qarastyrylǵan. Alaıda osy jelilerdi jasyl jelekterdi sýarýǵa paıdalaný kózdelmegen, jańbyr jáne erigen sýlardy qoldanystaǵy kollektorlarǵa burý eskerilmegen, bul jekelegen aýmaqtardyń sýdyń astyna qalýyna ákep soǵady. Sondyqtan qoldanystaǵy aryq jelileri men kollektorlardyń ótkizý qabiletin ulǵaıta otyryp, olardy rekonstrýktsııalaý jáne qurylys jumystaryn toqtatpaı biryńǵaı jelige qosýdy uıymdastyrýdy eskere otyryp, jobaǵa túzetý engiziledi», - deıdi Serik Ádilbaev.
Búginde kúni qalanyń batys bóliginde uzyndyǵy 119 km aryq jelilerin salý jáne rekonstrýktsııalaý boıynsha qurylys-montaj jumystary júrgizilýde, oryndalý merzimi - 2021-2023 jyldar aralyǵy.
Eske salaıyq, 11 mamyr kúni Almatyda nóser jaýyn jaýyp, qala aýmaǵynda birqatar kóshe men turǵyn úılerdiń aýlasyn sý basyp qaldy.
Jańbyr men daýyl saldarynan 19 aǵash qulady. Bir avtokólik pen bir úı zardap shekti.