Almatyda jańbyr kezinde sý basyp qalatyn aımaqtar jóndelip jatyr
Bıyl qalanyń alty aýdanynda sý alyp ketý qaýpi bar 37 aımaq anyqtalǵan. Bul jerlerdiń 32 paıyzy Naýryzbaı aýdanyna, 38 paıyzy Alataý aýdanyna tıesili.
37 aımaqtyń 7-eýi únemi sý astynda qalady, máselen kóktem kezinde bul jerler 19 ret sý alý jaǵdaıyna ushyraǵan. Alataý aýdany boıynsha 5 aımaqta, atap aıtqanda - Shosseınaıa k-si (6 jaǵdaı), Arshaly k-si (1 jaǵdaı), Magadan k-si (2 jaǵdaı), Nurpeıisov k-si (1 jaǵdaı) jáne Espaev k-si (1 jaǵdaı); Jetisý aýdanynda- 1 aımaq, ol Aerodrom k-si (1 jaǵdaı ); Bostandyq aýdanynda - 1 aımaq, ol «Baǵanashyl» yqsham aýdanyndaǵy Jeltoqsan k-si (7 jaǵdaı) bolǵan.
«Almaty kóshelerin sý basý sebebin eki bólikke jiktep qaraýǵa bolady. 55 paıyzy aryq júıeleriniń, jaýyn kárizderiniń, ózen ańǵarlarynyń qurylys jáne turmystyq zattarmen bitelip qalýynan bolady. Al 45 paıyzy aryq júıeleriniń bolmaýymen baılanysty. Ótken jylmen salystyrǵanda, bıyl sý basý jaǵdaıy 2 esege azaıǵan. Ákim qorynan bólingen aqshaǵa apattyń aldyn alý sharalaryn jasap jatyrmyz. Nátıjesinde múmkin degen apat sanyn 67 paıyzǵa azaıttyq»,-dedi Almaty TJD.
Ákim qorynan Alataý men Naýryzbaı aýdandaryndaǵy apatty aýyzdyqtaýǵa jáne Túrksib aýdanyndaǵy áýejaı ózenin qalpyna keltirýge 2 mlrd 344 mln teńge bólingen.
«1 mln 310 mln teńge Alataý aýdanyndaǵy aryq, sý sińirý júıesiniń qurylysyna jáne Qarasý yqsham aýdanyndaǵy jolǵa asfalt tóseýge jumsaldy. Naýryzbaı aýdany úshin 234 mln 352 myń teńge bólingen. Ol qarajat Amangeldi kóshesindegi aryq júıelerine, sondaı-aq Elibaev kóshesindegi qubyrly kópirdi almastyrýǵa jáne Tájıev kóshesindegi jol jóndeý jumystaryna ketti. Túrksib aýdanyndaǵy áýejaı ózenin qalpyna keltirýge 800 mln teńge jumsaldy»,-dedi qalalyq TJD.
Budan ózge, Almaty obylysy tabıǵı resýrstar jáne tabıǵat paıdalanýdy retteý basqarmasy men aýdandyq ákimdikter birlesip Almaly, Bostandyq, Medeý, Jetisý, Túrksib aýdandarynda 44 shaqyrym aryq júıesiniń qurylys jumystaryn júrgizip jatyr. Jáne Túrksib aýdanyndaǵy Úlken Qarasý ózeni ańǵarynda sýdy turaqtandyrý sharalary qolǵa alynǵan.
Sondaı-aq, Bostandyq aýdanyndaǵy Esentaı men Kereńqulaq ózenderi jaǵalaýlaryn bekitýge 384 mln teńge bólingen. Kishi Almaty ózenindegi kópir men Medeý-Shymbulaq avtojolynda júrip jatqan kúrdeli jóndeý jumystarynyń quny - 262 mln 216 teńge.